GÖNI WIDEOARAGATNAŞYK ARKALY GEÇIRILEN DUŞUŞYK
2022-nji ýylyň 28-nji aprelinde Türkmenistanyň Daşary işler ministrliginiň Halkara gatnaşyklary institutynyň Strategik barlaglar boýunça ylmy merkezi bilen Türkiýe Respublikasynyň Daşary işler ministrliginiň ýanyndaky gözlegler merkeziniň arasynda göni wideoaragatnaşyk arkaly duşuşyk geçirildi. Oňa degişli merkezleriň wekilleri gatnaşdylar.
Duşuşygyň barşynda ylmy merkeziň başlygy Şiri Şiriýew Türkmenistanyň Daşary işler ministrliginiň Halkara gatnaşyklary institutynda täze açylan ylmy merkeziň öňünde durýan maksatlar hem-de wezipeler barada giňişleýin gürrüň bermek bilen, geljekde sebitiň ýurtlarynyň ugurdaş merkezleriniň arasynda hyzmatdaşlyk gatnaşyklaryny ýola goýmagyň esasy wezipeleriň hatarynda durýandygyny mälim etdi. Şeýle-de Türkiýe Respublikasynyň Daşary işler ministrliginiň ýanyndaky gözlegler merkeziniň wekili Alper Aktaş geljekde iki ýurduň ylmy merkezleriniň gatnaşyklaryny işjeňleşdirmekde özara pikir alyşmalaryň zerurdygyny belläp, özlerini gyzyklandyrýan meseleler boýunça tegelek stol maslahatlarynyň geçirilmeginiň we bu barada makalalaryň çap edilmeginiň uly ähmiýete eýe boljakdygyny belledi.
Duşuşykda taraplar häzirki wagtda sebitde we dünýäde bolup geçýän syýasy wakalara, şeýle hem asyryň öňündäki meselelere seljerme bermekde ýola goýlan hyzmatdaşlygyň aýratyn orna eýedigini nygtadylar.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.