DURNUKLY ÖSÜŞIŇ GAZANYLMAGYNDA ÝAŞLARYŇ EKOLOGIÝA BILIMINIŇ ORNY
2026-njy ýylyň 25-nji maýynda Seýitnazar Seýdi adyndaky Türkmen döwlet mugallymçylyk institutynyň “Durnukly ösüş üçin ekologiýa bilimi” ÝUNESKO kafedrasynyň guramagynda Daşky gurşawy goramagyň bütindünýä güni mynasybetli “Durnukly ösüşiň gazanylmagynda ýaşlaryň ekologiýa biliminiň orny” atly IV ylmy-amaly maslahat geçirildi. Ýurdumyzyň döwlet syýasatynyň ileri tutulýan ugurlaryny we ekologiýa diplomatiýasyny özünde jemleýän bu çäre, ýokary derejede guramaçylykly we giň gerimli häsiýetde alnyp baryldy.
Maslahata ýurdumyzyň ýokary okuw mekdepleriniň professor-mugallymlary, ýaş alymlary we talyplary, hem-de Türkmenistanyň çäklerinde hereket edýän ÝUNESKO kafedralarynyň müdirleri, ÝUNESKO klublarynyň başlyklary we agzalary gatnaşdylar. Çärede Türkmenistanyň Daşary işler ministrliginiň Halkara gatnaşyklary institutynyň “Parahatçylyk medeniýeti” atly ÝUNESKO klubynyň wekilleri aýratyn işjeňlik görkezdiler.
Maslahatyň dabaraly umumy (plenar) mejlisinde ÝUNESKO-nyň işleri barada Türkmenistanyň Milli toparynyň jogapkär Sekretary, Türkmenistanyň Adatdan daşary we Doly ygtyýarly ilçisi, Türkmenistanyň Gahrymany Rustemowa Çynar Täjiýewna çykyş edip, ýurdumyzda ekologiýa biliminiň hilini döwrebap derejede ýokarlandyrmakda, ýaşlaryň tebigata bolan garaýyşlaryny ylmy esasda kämilleşdirmekde we ekologik medeniýeti ösdürmekde institutda alnyp barylýan köptaraply işlere uly baha berdi. Şunuň bilen birlikde, maslahata gatnaşan ýurdumyzda hereket edýän ÝUNESKO kafedralarynyň müdirleri we ÝUNESKO klublarynyň ýolbaşçylary, ýokary okuw mekdepleriniň professor-mugallymlary öz çykyşlarynda Durnukly Ösüş Maksatlaryny (DÖM) milli derejede durmuşa geçirmekde, daşky gurşawy goramak boýunça innowasion taslamalary hödürlemekde ýaşlaryň tutýan orny hem-de olaryň intellektual kuwwatynyň ähmiýeti barada giňişleýin durup geçdiler.
Umumy mejlis tamamlanandan soňra, ylmy-amaly maslahat öz işini öňde goýlan strategik wezipeleri doly açyp görkezýän 4 sany ugurdaş bölümçede dowam etdirdi. Birinji bölümçede «Hormatly Prezidentimiziň ekologiýa syýasatynyň dabaralanmagy. Ekologiýa meselelerde halkara hyzmatdaşlyk» diýen mowzuk boýunça çykyşlar diňlenip, onda Türkmenistanyň ekologiýa diplomatiýasynda sebit derejesinde we ÝUNESKO ýaly iri guramalar bilen bilelikde amala aşyrýan taslamalary seljerildi. Ikinji bölümçe «Tebigatyň goralyp saklanylmagy we ekologiýa abadançylygy» diýlip atlandyrylyp, onda ýurdumyzyň baý ösümlik we haýwanat dünýäsini goramak, tebigy goraghanalaryň işini kämilleşdirmek we tebigy baýlyklary durnukly peýdalanmagyň ylmy ýollary ara alnyp maslahatlaşyldy. Üçünji bölümçede bolsa «Biosferanyň, topraklaryň, suwuň we howanyň ekologiýasy. Global ekologik meseleler» diýip atlandyrylyp, çykyşlarda howanyň global derejede üýtgemegi, suw serişdelerini tygşytly ulanmak hem-de topragyň guraklaşmagyna garşy göreşmek boýunça teklipler öňe sürüldi. Maslahatyň dördünji bölümçesi «Ýaş nesilde ekologik endikleri kemala getirmegiň ylmy-usuly esaslary» diýen mowzuga bagyşlanyp, onda geljekki pedagoglaryň, ýaş alymlaryň kömegi bilen bilim ulgamyny ekologiýalaşdyrmak, mekdep okuwçylarynda we ýaşlarda tebigata bolan söýgini hemişelik terbiýelemek baradaky täze ylmy-metodikalar hödürlendi. Bölümçeleriň dowamynda beýan edilen bu ylmy çykyşlar we täze garaýyşlar ekologiýa biliminiň geljekki ösüşine gönükdirilen gymmatly tejribe alyşma meýdançasy bolup hyzmat etdi.
Maslahatyň ahyrynda gatnaşyjylar ýurdumyzda döwrebap ylym-bilim ulgamyny ösdürmeklige, dünýä ýüzünde durnukly ösüşi gazanmaga we ene topragymyzyň ekologik abadançylygyny üpjün etmäge döredip berýän giň gerimli mümkinçilikleri we yzygiderli goldawlary üçin türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza çuňňur hoşallyklaryny bildirdiler.
Aýgözel ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň uly mugallymy