DÜNÝÄ REÝTINGLERI WE YLMY NEŞIRLERIŇ ÄHMIÝETI BARADA SEMINAR GEÇIRILDI
2026-njy ýylyň 28-nji fewralynda ýurdumyzyň ýokary okuw mekdepleriniň hünärmenleriniň gatnaşmagynda "Dünýäniň öňdebaryjy uniwersitetleriniň reýtinginiň (THE, QS, ARWU, RUR, SIR) talaplary we ylmy neşirleriň strategiki ähmiýeti" atly onlaýn okuw seminary geçirildi. Bu çäre abraýly halkara ylmy-tehniki maglumat binýatlarynda we platformalarynda indekslenýän žurnallarda ylmy makalalary çap etmek işini utgaşdyrmak boýunça ýörite döredilen iş topary tarapyndan guraldy. Seminara ýokary okuw mekdepleriniň ylym bölümleriniň hünärmenleri, şeýle hem halkara ylmy neşirler bilen işleşmek boýunça bellenilen jogapkär wekiller uly gyzyklanma bildirdiler. Çäräniň dowamynda dünýäniň öňdebaryjy uniwersitetleriniň reýtinglerini kesgitleýän THE, QS we ARWU ýaly halkara ulgamlaryň esasy talaplary barada giňişleýin maglumatlar berildi.
Çykyş eden hünärmenler ylmy makalalaryň halkara derejesinde ykrar edilen platformalarda çap edilmeginiň strategiki ähmiýetine aýratyn üns berdiler. Bu ugurda alnyp barylýan işleriň ýokary okuw mekdepleriniň halkara abraýyny artdyrmakda we ylym giňişligine işjeň goşulmakda möhüm orun tutýandygy bellenildi. Gatnaşyjylar ylmy neşirleriň hili, makalalary taýýarlamagyň usullary we halkara standartlary barada özara tejribe alyşdylar.
Onlaýn maslahatyň ahyrynda gatnaşyjylar ylmy tema boýunça özlerini gyzyklandyrýan soraglar bilen çykyş edenlere ýüzlendiler. Bu okuw seminary ýurdumyzda ylym we bilim ulgamyny kämilleşdirmekde, ýaş alymlaryň halkara hyzmatdaşlygyny ösdürmekde uly ädim bolar.
Nurbibi GULJANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.