DOSTLUKLY SAPARA BAGYŞLANYP BRIFING GEÇIRILDI
2026-njy ýylyň 21-nji martynda Türkmenistanyň Daşary işler ministrliginiň Halkara gatnaşyklary institutynda Gahryman Arkadagymyzyň Hytaý Halk Respublikasyna amala aşyran dostluk saparyna, şeýle hem Milli Liderimiziň Hytaýyň «CGTN» teleýaýlymyna beren interwýusynyň syýasy ähmiýetine bagyşlanyp, «Altyn asyr: Türkmenistan» hem-de «Ýaşlyk» teleýaýlymlarynyň guramagynda brifing geçirildi. Oňa institutyň professor-mugallymlary, talyp ýaşlary gatnaşdylar. Brifingde çykyş edenler Türkmenistan bilen Hytaýyň dünýägaraýşynyň, ählumumy parahatçylyk, howpsuzlyk meselelerinde maksatlarynyň hem-de wezipeleriniň ýakyndygyny anyk mysallar arkaly düşündirip, bu boýunça öz pikir-garaýyşlaryny beýan etdiler.
Çykyşlarda nygtalşy ýaly, ikitaraplaýyn gatnaşyklarda ylym-bilim ulgamyna aýratyn orun degişli bolup, häzirki wagtda ýurdumyzyň baýry ýokary okuw mekdebi bolan Magtymguly adyndaky Türkmen döwlet uniwersitetinde, Döwletmämmet Azady adyndaky Türkmen milli dünýä dilleri institutynda hytaý dili boýunça hünärmenleriň taýýarlanylýandygy, bu ýerde okuwlary ýokary derejede guramaga hytaýly hünärmenleriň ýakyndan ýardam berýändigi bellemäge mynasypdyr. Şeýle-de Türkmenistanyň Daşary işler ministrliginiň Halkara gatnaşyklary institutynda halkara gatnaşyklary boýunça geljekki hünärmenlere hytaý dili öwredilýär. Ýurdumyzyň «Türkmenistan» teleýaýlymynyň gepleşikleri dünýä boýunça 7 dilde ýaýlyma berlip, olaryň arasynda hytaý dili hem bar. Hytaýyň uniwersitetlerinde hem türkmen dilini öwrenmäge bolan gyzyklanma uly. Bu bolsa medeni-ynsanperwer gatnaşyklaryň ýokary derejesini görkezýär.
Bellenilişi ýaly, Türkmenistan bilen HHR-iň arasyndaky syýasy-diplomatik, söwda-ykdysady we medeni-ynsanperwer ugurlar boýunça gatnaşyklar iki ýurduň halkara hyzmatdaşlygynyň esasyny düzýär. Şu jähetden, brifinde çykyş edenler Gahryman Arkadagymyzyň Hytaýyň «CGTN» teleýaýlymyna beren interwýusynyň ýokary ähmiýetini bellediler.
Brifingde talyp ýaşlar özlerini gyzyklandyrýan sowallar bilen ýüzlenip, ikitaraplaýyn gatnaşyklaryň dürli ugurlary boýunça öz garaýyşlaryny paýlaşdylar. Brifingiň ahyrynda oňa gatnaşyjylar milli diplomatiýamyzy bütin dünýäde dabaralandyrýan Gahryman Arkadagymyza hem-de hormatly Prezidentimiz Arkadagly Gahryman Serdarymyza hoşallyk sözlerini beýan etdiler.
Aýşirin DÖWLETOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
IV ýyl talyby.