«Ekologiýa medeniýeti - abadançylygyň gözbaşy» atly bäsleşik geçirildi
2025-nji ýylyň 23-nji maýynda Türkmenistanyň Daşary işler ministrliginiň Halkara gatnaşyklary institutynyň «Parahatçylyk medeniýeti» atly UNESCO klubunyň guramagynda «Ekologiýa medeniýeti - abadançylygyň gözbaşy» atly bäsleşik geçirildi. Oňa institutymyzyň Halkara gatnaşyklary, Halkara hukugy, Halkara ykdysady gatnaşyklary we Halkara žurnalistikasy fakultetleriniň I-III ýyl talyplaryndan düzülen toparlar gatnaşdylar.
Bäsleşik BMG-niň Baş Assambleýasy tarapyndan yglan edilen Medeni dürlüligiň halkara güni mynasybetli guraldy. Mälim bolşy ýaly, medeni dürlüligiň halkara güni her ýylyň 21-nji maýynda bellenilýär. Bu halkara sene dürli halklaryň medeni aýratynlyklaryna hormat goýmak, bu ugurdaky gatnaşyklary berkitmek, özara düşünişmegi ösdürmek maksady bilen döredildi. Bu bäsleşigiň geçirilmegi hem talyp ýaşlaryň arasynda medeni diplomatiýanyň ähmiýeti, medeni dürlüligiň gymmaty hem-de parahatçylykly dialoga esaslanýan halkara gatnaşyklary barada düşünjäni ösdürmekde möhüm orna eýe boldy.
Bäsleşik üç tapgyrda geçirildi. Birinji tapgyra laýyklykda talyplar prezentasiýa görnüşinde öz saýlan milletleriniň ekologiýa medeniýeti barada gürrüň berdiler. Ikinji tapgyr boýunça saýlan milletiniň milli tagamy bilen tanyşdyrdylar. Jemleýji üçünji tapgyr bolsa, wiktorina görnüşinde bolup, gatnaşyjylar Türkmenistan bilen UNESCO-nyň arasyndaky hyzmatdaşlyk barada berlen sowallara jogap berdiler. Emin agzalarynyň gelen netijesine görä, Halkara gatnaşyklary fakultetiniň talyplaryndan düzülen topar I, Halkara ykdysady gatnaşyklary fakultetiniň talyplary II hem-de Halkara žurnalistikasy fakultetiniň talyplary III orna mynasyp boldular. Ýeňiji bolan toparlar degişli Hormat hatlary we ýadygärlik sowgatlary bilen sylaglandylar.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň V ýyl talyby.