BITARAPLYGYŇ WE ÖŇÜNI ALYŞ DIPLOMATIÝASYNYŇ MÜMKINÇILIKLERI BOÝUNÇA OKUW SAPAGY GEÇIRILDI
2025-nji ýylyň 30-njy oktýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda «Öňüni alyş diplomatiýasy» ugry boýunça «Bitaraplygyň we öňüni alyş diplomatiýasynyň bilelikdäki mümkinçilikleriniň netijeli ugurlary» atly okuw sapagy geçirildi. Okuw sapagyny institutyň Halkara gatnaşyklary we diplomatiýa kafedrasynyň uly mugallymy Begenç Karaýew alyp bardy.
Sapagyň dowamynda halypa mugallym bitaraplygyň halkara gatnaşyklarynda durnuklylygy saklamakdaky, gepleşik medeniýetini ösdürmekdäki hem-de parahatçylykly çözgütleri kabul etmegiň ähmiýeti barada giňişleýin düşündiriş berdi. Şeýle hem häzirki döwürde öňüni alyş diplomatiýasynyň ähmiýeti, Bitaraplygyň orny, şeýle-de parahatçylygy goldamakda we dünýä gurluşyny berkitmekde Birleşen Milletler Guramasynyň ýörite syýasy edaralarynyň ähmiýeti barada gürrüň edildi.
Okuw sapagynyň ahyrynda talyplar özlerini gyzyklandyrýan sowallar bilen çykyş edip, mugallym bilen pikir alyşdylar.
Hemragylyç NURMÄMMEDOW,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.