Birleşen Milletler Guramasynyň Awazada boljak forumy dogrusynda maslahat geçirildi
2025-nji ýylyň 14-nji iýulynda Türkmenistanyň Daşary işler ministrliginiň Halkara gatnaşyklary institutynda şu ýylyň 4-8-nji awgusty aralygynda «Awaza» milli syýahatçylyk zolagynda geçiriljek Birleşen Milletler Guramasynyň Deňze çykalgasy bolmadyk ösüp barýan ýurtlar boýunça III forumyna bagyşlanan maslahat geçirildi. Bu maslahata ähli ýokary okuw mekdepleriniň mugallymlarydyr talyp ýaşlaryndan saýlanan ýaş wagyzçylar hem-de meýletinçiler gatnaşdylar.
Maslahatyň dowamynda çykyş edenler Gahryman Arkadagymyzyň 13-nji iýulda guramaçylyk döwlet toparynyň maslahatynda beren tabşyryklaryndan gelip çykýan wezipeleri ýerine ýetirmegiň möhüm ähmiýeti barada durup geçdiler. Şeýle hem BMG-niň Baş Assambleýasynyň 79-njy sessiýasynyň şu ýylyň 11-nji aprelinde geçirilen 63-nji plenar mejlisinde bu maslahatyň ýurdumyzda geçirilmegi bilen bagly degişli Kararnamanyň kabul edilendigi we dünýäniň 57 döwletiniň şol resminamanyň awtordaşy hökmünde çykyş edendigi dogrusynda nygtaldy. Şunuň bilen baglylykda, şu ýylyň 4-nji iýulynda hormatly Prezidentimiziň «Birleşen Milletler Guramasynyň Deňze çykalgasy bolmadyk ösüp barýan ýurtlar boýunça üçünji maslahatyny geçirmek hakynda» Karara gol çekendigi we onda bu maslahaty hem-de onuň çäklerindäki ugurdaş çäreleri ýokary guramaçylyk derejesinde geçirmegiň bellenilendigini aýtdylar.
Berkarar döwletiň täze eýýamynyň Galkynyşy döwründe ýurdumyzyň öňe sürýän başlangyçlary dünýä bileleşigi tarapyndan giňden ykrar edilýär. Dost-doganlyk deňzi bolan Hazaryň türkmen kenarynda geçiriljek gürrüňi edilýän maslahat hem ählumumy ösüşi ilerletmekde wajyp waka bolar.
Serdar ÝAZJUMAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
I ýyl talyby.