AKYLDAR ŞAHYRYMYZA BAGYŞLANAN YLMY-DÖREDIJILIK MASLAHATY
2025-nji ýylyň 21-nji maýynda Türkmenistanyň Daşary işler ministrliginiň Halkara gatnaşyklary institutynda Halkara parahatçylyk we ynanyşmak ýylyny, şeýle hem akyldar şahyrymyz Magtymguly Pyragynyň edebi mirasyny ýaşlaryň arasynda wagyz etmek maksady bilen, «Magtymgula düşünmegiň açary» atly ylmy-döredijilik maslahaty geçirildi. Bu maslahat institutyň Žurnalistikanyň nazaryýeti we amalyýeti kafedrasy hem-de «Ýaş žurnalistler» ylmy-döredijilik gurnagy tarapyndan bilelikde guraldy.
Ylmy-döredijilik maslahatynda ýurdumyzyň parahatçylyk söýüjilikli ýörelgeleri, milli diplomatiýamyzyň üstünlikleri, şeýle hem parahatçylygyň beýik waspçysy Magtymguly Pyragynyň döredijiligi, onuň eserleriniň ýaş nesilleri terbiýelemekdäki orny, halkara derejede beýik şahyra bagyşlanyp geçirilýän dabaralar barada giňişleýin söhbet edildi. Hormatly Prezidentimiziň «Magtymguly ― dünýäniň akyldary» atly kitabyna möhüm ornuň degişlidigi aýratyn nygtalyp, şu gezekki maslahatyň adyna üns çekildi. Bu kitabyň ilkinji bölümi bilen adybir guralan maslahatda edilen çykyşlarda bütin dünýäde «Halkara parahatçylyk we ynanyşmak ýyly» diýlip yglan edilen şu ýylymyzda halkara derejeli çäreleriň giň gerim alýandygy bellenildi. Şunda ýaş halkaraçy hünärmenlere, aýratyn hem, geljekki halkaraçy žurnalistlere möhüm orun degişlidir.
Ylmy-döredijilik maslahatyna gatnaşyjylar beýik söz ussady Magtymguly Pyragynyň edebi mirasyny bütin dünýäde dabaralandyrýan türkmen halkynyň Milli Lideri Gahryman Arkadagymyza hem-de Arkadagly Gahryman Serdarymyza tüýs ýürekden çykýan alkyş sözlerini beýan etdiler.
Güljemile DÄDEBAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.