ABŞ-NYŇ KENT DÖWLET UNIWERSITETINIŇ WEKILLERI BILEN DUŞUŞYK
2025-nji ýylyň 18-nji iýunynda Türkmenistanyň Daşary işler ministrliginiň Halkara gatnaşyklary institutynda Amerikanyň Birleşen Ştatlarynyň Kent döwlet uniwersitetiniň wise-prezidenti Marçello Fantoniniň ýolbaşçylygyndaky wekiliýet bilen ikitaraplaýyn duşuşyk we institut boýunça tanyşlyk geçirildi.
Duşuşygyň maksady Türkmenistanyň Daşary işler ministrliginiň Halkara gatnaşyklary instituty bilen ABŞ-nyň Kent döwlet uniwersitetiniň arasynda gol çekilen Özara düşünişmek barada Ähtnamanyň çäklerinde bilelikdäki bilim maksatnamalaryny amala aşyrmagyň geljekki ädimlerini ara alyp maslahatlaşmakdan, ýokary okuw mekdepleriniň okuw meýilnamalaryny halkara ülňüleriniň talaplaryna laýyklykda taýýarlamakdan ybarat boldy.
1910-njy ýylda esaslandyrylan bu uniwersitet, bilim, işewürlik we tehnologiýa boýunça innowasion maksatnamalary bilen tanalýan ABŞ-nyň iň uly we abraýly döwlet edaralarynyň biridir. Ýeri gelende bellesek, Kent döwlet uniwersiteti bilen Türkmenistanyň ýokary okuw mekdepleriniň üçüsiniň arasynda üç sany Özara düşünişmek hakynda Ähtnamalara gol çekildi. Olar: Halkara ynsanperwer ylymlary we ösüş uniwersiteti, Türkmenistanyň Daşary işler ministrliginiň Halkara gatnaşyklary instituty we Türkmen döwlet binagärlik we gurluşyk institutydyr. Bu ylalaşyklar akademiki maksatnamalary giňeltmegi, bilelikdäki bilim we ylmy başlangyçlary döretmegi we ýurtlaryň arasynda medeni alyşmalary güýçlendirmegi maksat edinýär.
Duşuşykdan soň institut boýunça tanyşlyk geçirildi. Myhmanlar türkmen diplomatiýasynyň taryhy muzeýi, «Parahatçylyk medeniýeti» atly ÝUNESKO kluby, türkmeniň ak öýi we institutyň okuw studiýasy, şeýle hem institutda hereket edýän nemes, türk kitaphanalary bilen tanyşdyryldy. Bu gezelenç hormatly myhmanlarda ýakymly täsir galdyrdy.
Geçirilen duşuşyk we tanyşlyk türkmen diplomatiýasynyň milli mekdebiniň hem-de Kent döwlet uniwersitetiniň arasyndaky hyzmatdaşlygy, medeniýetara gatnaşyklary ösdürmekde, şeýle hem türkmen ýokary okuw mekdeplerini halkara bilim giňişligine ýakynlaşdyrmak we dünýäniň öňdebaryjy uniwersitetleri bilen hyzmatdaşlygy ýola goýmak boýunça Türkmenistanyň strategik maksatlaryny durmuşa geçirmekde möhüm ädime öwrüldi.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.