Uçurymyň ýürek buýsanjy
Şu gün Türkmenistanyň Daşary işler ministrliginiň Halkara gatnaşyklary institutynda magistratura ugry boýunça okuw möhletini tamamlan uçurymlaryň baýramçylyk dabarasy geçirildi. Tutuş bir ýylyň jemini jemlän şanly waka hemmeleriň ýadynda öçmejek yz galdyrdy. Bu ýyl institutyň düzüminde magistratura ugurly uçurymlaryň 63-si tamamlady. Meniň hem paýyma türkmen diplomatiýasynyň milli mekdebi bolan Türkmenistanyň Daşary işler ministrliginiň Halkara gatnaşyklary institutynyň taýýarlygyň Gündogary öwreniş ugry boýunça magistranty bolup tamamlamak miýesser etdi.
Ýylyň dowamynda Gündogar döwletleriniň syýasaty we diplomatiýasy barada bilimlerimizi baýlaşdyrdyk. Magistrantlyk okuwynda alan bilimlerim netijesinde geljekki ýyllarda ýurdumyzyň daşary syýasat ugruny mundan beýläkde ösdürmekde zähmet çekjekdigime ynanýaryn. Bize magistrlik okuwymyzy üstünlikli tamamlamakda goldawlaryny aýamadyk institutyň ýolbaşçylaryna, bize ders beren professor-mugallymlarymyza çäksiz hoşallyk sözlerimi aýdasym gelýär.
Ata Watanymyzyň halkara giňişlikdäki abraýyna abraý goşmak, türkmen ýaşlarynyň dünýä we döwür bilen aýakdaş gitmeklerini üpjün etmek üçin ähli mümkinçilikleri döredip berýän Gahryman Arkadagymyzyň, Arkadagly Gahryman Serdarymyzyň janlarynyň sag, belent başlarynyň aman bolmagyny arzuw edýärin.
Aýläle TOÝLYÝEWA,
Türkmenistanyň Daşary işler ministrliginiň
Halkara gatnaşyklary institutynyň taýýarlygyň
Gündogary öwreniş ugry boýunça magistranty