Türkmenistanyň Prezidentiniň Täjigistana döwlet sapary: birinji günüň wakalary gysga setirlerde
Berkarar döwletiň täze eýýamynyň Galkynyşy döwründe Türkmenistan dünýä döwletleri bilen hoşniýetli hyzmatdaşlygy ösdürmäge aýratyn üns berýär. Bu babatda bize golaý bolan Merkezi Aziýa döwletlerine aýratyn orun degişli. Şol döwletleriň biri-de Täjigistan Respublikasydyr. Bilşimiz ýaly, 10-njy maýda hormatly Prezidentimiz Serdar Berdimuhamedow Täjigistan Respublikasyna döwlet sapary bilen bardy. Arkadagly Serdarymyzy Duşenbe şäheriniň Halkara howa menzilinde ýurduň Premýer-ministri Kohir Rasulzoda we beýleki resmi adamlar mähirli garşyladylar. Soňra täjik paýtagtyndaky «Kasri Millat» köşgünde Türkmenistanyň we Täjigistanyň Prezidentleri ikiçäk gepleşikleri geçirdiler. Gepleşiklerde iki tarapyň hem türkmen-täjik gatnaşyklarynyň yzygiderli ösdürilmegine ygrarlydygy bellenildi. Soňra gepleşikler giňeldilen düzümde dowam etdirildi. Gepleşikleriň barşynda iki ýurduň arasyndaky hyzmatdaşlygyň ýeten derejesi kanagatlanma bilen bellenilip, mundan beýläk-de syýasy, söwda-ykdysady, ýangyç-energetika, ulag-logistika we medeni-ynsanperwer ugurlarda ikitaraplaýyn gatnaşyklaryň baý mümkinçilikler gorunyň bardygyna üns çekildi. Gepleşikleriň netijesinde iki ýurduň arasynda 24 sany resminama gol çekildi. Olaryň hatarynda Türkmenistan bilen Täjigistanyň arasynda strategik hyzmatdaşlygy çuňlaşdyrmak hakynda Jarnamanyň hem bardygyny aýratyn bellemek gerek. Soňra iki ýurduň döwlet Baştutanlary köpçülikleýin habar beriş serişdeleriniň wekillerine ýüzlenme bilen çykyş etdiler. Saparyň dowamynda hormatly Prezidentimiz Täjigistanyň Prezidenti bilen bilelikde göni wideoaragatnaşyk arkaly ýurduň Hatlon welaýatynyň Dusti etrabynyň Ergeş Sultanow daýhan birleşiginde Magtymguly adyndaky umumybilim berýän orta mekdebiň binasynyň düýbüniň tutulyş dabarasyna gatnaşdy. Mundan başga-da, hormatly Prezidentimiz Täjigistan Respublikasyna amala aşyrýan ilkinji döwlet saparynyň birinji gününde Duşenbe şäheriniň merkezindäki «Dusti» ýadygärlikler toplumyndaky Ismoil Somoniniň ýadygärligine gül desselerini goýdy. Günüň ikinji ýarymynda hormatly Prezidentimiz döwlet saparynyň maksatnamalarynyň çäklerinde Täjigistan Respublikasynyň Oli Majlisiniň Namoýandagon Majlisiniň we Milli Majlisiniň Başlyklary bilen duşuşyp, iki ýurduň arasyndaky parlamentara gatnaşyklaryň häzirki ýagdaýyny we geljegini ara alyp maslahatlaşdy. Günüň ahyrynda Duşenbe şäherindäki «Nowruz» köşgünde Türkmenistanyň Prezidentiniň hormatyna täjik Lideri Emomali Rahmon tarapyndan resmi agşamlyk nahary berildi.
Halbibi SATLYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.