TÜRKMENISTAN-NIDERLANDLAR PATYŞALYGY: DIPLOMATIKI GATNAŞYKLARYŇ 30 ÝYLLYGYNA
Türkmenistan bilen Niderlandlar Patyşalygynyň arasyndaky diplomatik gatnaşyklar 1992-nji ýylyň maýynda ýola goýuldy. Şu ýylyň maý aýynda hem diplomatik gatnaşyklaryň ýola goýulmagyna 30 ýyl boldy. Häzirki wagtda Türkmenistan Niderlandlar Patyşalygy bilen ählitaraplaýyn oňyn gatnaşyklary ösdürmäge uly gyzyklanma bildirýär. Döwletleriň arasynda köpugurly, ikitaraplaýyn syýasy-diplomatik gatnaşyklary ösdürmek we işjeňleşdirmek babatda birnäçe işler alnyp barylýar.
Niderlandlar Patyşalygynyň ykdysadyýeti açyk we halkara söwdasyna berk bil baglaýar Türkmen-niderland gatnaşyklary, esasan-da oba hojalyk pudagyny öz içine alýar. Häzirki wagtda birnäçe türkmen hususyýetçileri, şol sanda “Sahawatly” hojalyk jemgyýeti iri şahly mallary satyn almak, “Nurly meýdan” daýhan hojalygy dürli görnüşli bägüller bilen üpjün etmek boýunça Niderlandlar Patyşalygynyň kompaniýalary bilen hyzmatdaşlyk saklaýar. Türkmenistan hem 2020-nji ýylda dünýäde eksport etmekde öňdebaryjy onluga girýän bu ýurduň “Damen Shipyards Gorinchem” kompaniýasynyň wekilleri bilen gämi gurluşyk pudagyndaky taslamalar boýunça gepleşik geçirdi.
Ýeri gelende belläp geçsek, ýurdumyzda hem döwrebap ýyladyşhanalary hereket edýär. Olarda ähli şertler döredilip, önümçilik göwnelaýyk alnyp barylýar. Ýyladyşhanada daşary ýurt döwletleri bilen bir hatarda, Niderlandlar Patyşalygyndan getirilen döwrebap enjamlar ornaşdyrylyp, işleriň aglaba böleginiň sanly tehnologiýalara esaslanmagy üpjün edilýär.
Şu ýylyň maý aýynyň 20-sine hormatly Prezidentimiz Niderlandlaryň Patyşasy Willem-Aleksandra we ýurduň ähli halkyna Türkmenistan bilen Niderlandlar Patyşalygynyň arasynda diplomatik gatnaşyklaryň ýola goýulmagynyň 30 ýyllygy mynasybetli tüýs ýürekden gutlaglaryny we iň gowy arzuwlaryny iberdi. Häzirki wagtda birek-birege hormat goýmaga, deňhukuklylyga hem-de özara ynanyşmaga esaslanýan bu iki döwletiň arasyndaky gatnaşyklaryň bilelikdäki tagallalaryň netijesinde mundan beýläk-de ösdüriljekdigine uly ynam bildirilýär.
Gurbanjemal EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.