Türkmen-özbek gatnaşyklaryna 30 ýyl
Berkarar döwletiň täze eýýamynyň Galkynyşy döwründe Garaşsyz, baky Bitarap Türkmenistan Watanymyz goňşy döwletler bilen hoşniýetli goňşuçylyk gatnaşyklaryny barha berkidýär. Bu bolsa öz gezeginde goňşy döwletler bilen ysnyşykly we köptaraplaýyn gatnaşyklary ösdürmek döwletimiziň daşary syýasatynyň möhüm ugry bolup durýar.
Hormatly Prezidentimiziň parasatly ýolbaşçylygynda ösüş ýoly bilen ynamly öňe barýan ata Watanymyz serhetleşýän goňşy döwletlerimiziň biri bolan Özbegistan Respublikasy bilen dost – doganlyk gatnaşyklary ýokary depginde ösdürilýär we oňyn netijeler gazanylýar. Türkmenistan bilen Özbegistan Respublikasynyň arasynda diplomatik gatnaşyklar 1993-nji ýylyň 7-nji fewralynda nota alyşmak esasynda ýola goýuldy. Şol ýyldan bäri hem Türkmenistan we Özbegistan Respublikasy syýasy, söwda-ykdysady we medeni-ynsanperwer ulgamlarda işjeň hyzmatdaşlyk edýär. Iki döwletiň arasynda geçirilýän yzygiderli duşuşyklar, ýokary derejäki gepleşikler, maslahatlar oňa aýdyň şaýatlyk edýär.
Türkmenistan bilen Özbegistan Respublikasynyň arasynda diplomatik gatnaşyklaryň ýola goýulmagynyň 30 ýyllyk şanly senesine bagyşlanyp, 3-nji fewralda Aşgabadyň «Daşkent» medeni-dynç alyş seýilgähinde türkmen-özbek aýdym-sazly konserti we dabarasy geçirildi.Alnyp barylýan yzygiderli tagallalar netijesinde goňşy we dostlukly hyzmatdaş ýurduň arasyndaky gatnaşyklaryň häzirki döwürde giň gerimli ugurlar, şol sanda syýasy, ykdysady we medeni-ynsanperwer ulgamlar boýunça depginli ösdürilýär. Soňky wagtlarda, esasan hem medeni gatnaşyklaryň baý mazmuna eýe bolup, bu ugurdaky hyzmatdaşlygyň barha pugtalandyrylýandygyny nygtamak gerek.
Ýagşymyrat ÖWEZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň I ýyl talyby.