PARAHATÇYLYGYŇ WE YNANYŞMAGYŇ DABARASY
Her ýylyň 18-nji fewralynda ýurdumyzda giňden bellenilýän Diplomatik işgärleriň güni Garaşsyz, baky Bitarap Türkmenistanyň halkara giňişligindäki üstünlikleriniň, döwletimiziň abraý-mertebesini dünýä ýaýýan diplomatlaryň yhlasly hem-de döredijilikli zähmetiniň beýik dabarasydyr. Bu baýram «Garaşsyz, baky Bitarap Türkmenistan – bedew batly at-myradyň mekany» ýylynda aýratyn many-mazmuna eýe bolýar. Çünki ýurdumyzyň bedew bady bilen öňe barýan ösüşleri halkara gatnaşyklarda hem öz mynasyp beýanyny tapýar.
Diplomatiýa — bu döwletleriň arasynda parahatçylygy, howpsuzlygy we durnukly ösüşi üpjün etmegiň iň möhüm serişdeleriniň biridir. Ol gapma-garşylyklary güýç ulanman, gepleşikler, dialog we özara hormat goýmak arkaly çözmegiň netijeli ýoludyr. Diplomatiýanyň üsti bilen ýurtlar milli bähbitlerini gorap, şol bir wagtyň özünde halkara hyzmatdaşlygyny ösdürýärler, ykdysady, medeni we ynsanperwer gatnaşyklary giňeldýärler. Häzirki çylşyrymly dünýä şertlerinde diplomatiýa diňe bir daşary syýasatyň guraly bolman, eýsem ynanyşmak medeniýetini berkitmegiň, halklaryň arasynda dostluk köprülerini gurmagyň we umumy abadançylygy gazanmagyň möhüm binýadydyr.
Türkmenistanyň daşary syýasaty ilkinji günlerden bäri oňyn Bitaraplyk, deňhukukly hyzmatdaşlyk, hoşniýetli goňşuçylyk we özara hormat goýmak ýörelgelerine esaslanýar. Bu ýol dünýä jemgyýetçiligi tarapyndan giň goldawa eýe boldy. Munuň aýdyň subutnamasy hökmünde Birleşen Milletler Guramasy tarapyndan ýurdumyzyň hemişelik Bitaraplygynyň degişli Kararnamalar bilen üç gezek ykrar edilendigini aýratyn bellemek gerek. Şeýle hem Aşgabat şäherinde üstünlikli iş alyp barýan Birleşen Milletler Guramasynyň Merkezi Aziýa üçin öňüni alyş diplomatiýasy boýunça sebit merkezi ýurdumyzyň öňüni alyş diplomatiýasyndaky işjeň ornunyň halkara derejesinde ykrar edilýändigini görkezýär.
Türkmen diplomatiýasy ýyllaryň dowamynda berk tejribe mekdebini döretdi. Döwletimiziň halkara başlangyçlarynyň giňden goldanylmagy, parahatçylyk, howpsuzlyk, energetika, ulag, ekologiýa hem-de durnukly ösüş ugurlarynda kabul edilen möhüm Kararnamalar ýurdumyzyň dünýä syýasatyndaky işjeň ornunyň subutnamasydyr. Bu gün Türkmenistan dialogy, ynanyşmagy we köptaraplaýyn hyzmatdaşlygy ösdürmek arkaly dünýäde parahatçylykly ösüşe mynasyp goşant goşýar.
Häzirki döwrüň çylşyrymly ýagdaýlarynda — howanyň üýtgemegi, geosyýasy dartgynlyklar, azyk we energetika howpsuzlygy bilen bagly meseleler ýüze çykýan şertlerde — diplomatiýanyň ähmiýeti has-da artýar. Döwletleriň arasynda özara düşünişmegi gazanmak, ylalaşyklary berkitmek we uzak möhletleýin hyzmatdaşlygy ösdürmek üçin diplomatik ussatlyk, sabyr-takat hem-de giň dünýägaraýyş zerurdyr. Türkmen diplomatlary hut şu häsiýetleri öz işlerinde üstünlikli görkezýärler.
Türkmenistanyň daşary syýasatynyň dowamlylygyny üpjün etmek maksady bilen döredilen Türkmenistanyň Daşary işler ministrliginiň Halkara gatnaşyklary instituty häzirki zaman halkara gatnaşyklarynyň talaplaryna laýyk gelýän hünärmenleri taýýarlamakda möhüm orun eýeleýär. Bu ýokary okuw mekdebi ýaş nesliň arasynda watansöýüjiligi, ýokary ahlak ýörelgelerini we döwlet bähbitlerine wepadarlygy terbiýeleýär. Şeýle taýýarlyk geljekde ýurdumyzyň halkara giňişlikdäki ornuny has-da berkitmäge hyzmat edýär.
Diplomatik gullugyň öňünde goýulýan belent maksatlar döwletimiziň uzak möhletleýin ösüş strategiýasy bilen berk baglydyr. Parahatçylyk, ynanyşmak we özara hormat goýmak ýörelgelerine daýanýan türkmen diplomatiýasy geljekde hem halkara giňişlikde ýurdumyzyň bähbitlerini mynasyp gorap, dünýäde durnukly ösüşe gönükdirilen başlangyçlary öňe sürmegini dowam etdirer.
Diplomatik işgärleriň güni mynasybetli size berk jan saglyk, maşgala abadançylygy, belent maksatly işleriňizde uly üstünlikleri arzuw edýäris. Goý, «Garaşsyz, baky Bitarap Türkmenistan – bedew batly at-myradyň mekany» ýylynda täze üstünliklere badalga berip, ýurdumyzyň diplomatiýasy parahatçylygyň, ynanyşmagyň we hyzmatdaşlygyň ýolunda mundan beýläk hem bedew bady bilen öňe barsyn!
Sülgün NEPESOWA,
Türkmenistanyň Daşary işler minstrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy.