«KazanForum — 2023»: ykdysady hyzmatdaşlygy ilerletmekde möhüm başlangyçlar
18-19-njy maýda Russiýa Federasiýasynyň Tatarystan Respublikasynyň paýtagty Kazan şäherinde «Russiýa — Yslam dünýäsi: KazanForum — 2023» XIV halkara ykdysady forumy geçirildi. Halkara guramalaryň, jemgyýetçilik we maliýe edaralarynyň wekillerini, diplomatlary, syýasatçylary, işewürleri we telekeçileri özünde birleşdiren halkara foruma türkmen wekiliýeti hem gatnaşdy. Bu barada 16-njy maýda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Russiýa Federasiýasynyň Tatarystan Respublikasynyň Baştutany Rustam Minnihanowyň arasynda geçirilen telefon arkaly söhbetdeşlikde-de bellenilipdi. Dünýä döwletleriniň 84-sinden 15 müňe golaý wekiliň gatnaşmagynda ýokary derejede guralan halkara ykdysady forumyň dowamynda Russiýanyň, Gazagystanyň, Türkmenistanyň, Eýranyň we Hindistanyň arasynda demir ýol hem-de ulag gurluşyk meýilnamalary babatdaky meseleler ara alnyp maslahatlaşyldy. Bu forumyň çäklerinde ««Russia Halal EXPO» gözden geçirilişi we «Kazan EXPO» halkara sergi merkezinde maýa goýum we infrastruktura taslamalarynyň sergisi, Kazan halkara atçylyk sport toplumynda «Russia Halal Market» ýarmarkasy, şonuň ýaly-da yslam dünýäsiniň aşpezleriniň aşhana sergisi hem geçirildi. Mundan başga-da, forumyň dowamynda «Russiýa bilen Türkmenistanyň arasynda senagat, ulag we logistika pudagynda hyzmatdaşlygy ösdürmek üçin infrastruktura şertleri» atly aýratyn mejlis boldy. Bu mejlise türkmen wekiliýetiniň ýolbaşçysy hökmünde Türkmenistanyň Ministrler Kabinetiniň ýanyndaky Ulag we kommunikasiýalar agentliginiň Baş direktory Mämmethan Çakyýew hem gatnaşdy. Türkmen wekiliýetiniň ýolbaşçysy Demirgazyk-Günorta ITC boýunça ýük gatnawyny artdyrmagyň mümkinçilikleri barada durup geçip, Astrahan sebiti bilen işjeň hyzmatdaşlygyň alnyp barylýandygyny aýtdy. Bellenilişi ýaly, Astrahan sebitiniň portunyň ýörite ykdysady zolagynda logistika merkezini döretmek barada Ähtnama gol çekildi. Munuň özi merkezde ýük daşamalarynyň artdyrylmagyna, şeýle-de Demirgazyk-Günorta ugurlarynyň mundan beýläk-de ösdürilmegine oňyn itergi bolar.
Şeker BATYROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň II ýyl talyby.