Kämil bilim — beýik geljegiň binýady
Halkymyzda «Bilim bilen hikmet — altyndan gymmat» diýen paýhasly aýtgy bar. Çünki bilim — jemgyýetiň ösüşini üpjün edýän, ony öňe ilerledýän gymmatlyk. Şunuň bilen baglylykda, Türkmenistan döwletimizde ýaş nesle berilýän bilimiň hilini kämilleşdirmek, bilim ulgamynyň maddy-enjamlaýyn binýadyny yzygiderli gowulandyrmak babatda uly işler durmuşa geçirilýär. Gahryman Arkadagymyzyň parasatly başlangyçlaryny üstünlikli dowam etdirýän hormatly Prezidentimiz: «Beýik Watanymyzyň berkararlygy, güýç-kuwwaty, abraý-mertebesi her bir türkmen ýigidiniň we gyzynyň biliminde, şahsyýet hökmünde kämilliginde jemlenendir» diýip bellemek bilen, ýaş nesilleriň ruhy we beden taýdan sagdyn hem-de kämil şahsyýetler bolup ýetişmegine möhüm ähmiýet berýär. Şu jähetden, 24-nji awgustda Türkmenistanyň Bilim ministrliginiň guramagynda Magtymguly adyndaky Türkmen döwlet uniwersitetinde «Pähim-paýhas ummany Magtymguly Pyragy» ady bilen ýurdumyzyň ylym-bilim ulgamynyň ýolbaşçylarynyň we bu ulgamda zähmet çekýän hünärmenlerdir mugallymlaryň gatnaşmagynda awgust maslahatynyň geçirilmegi aýratyn ähmiýete eýedir.
Maslahatda 2023-2024-nji okuw ýylynyň jemi jemlenildi hem-de täze okuw ýylynda bilim işgärleriniň öňünde durýan möhüm wezipeler ara alnyp maslahatlaşyldy. Çykyş edenleriň belleýşi ýaly, geçen okuw ýylynda ýurdumyzyň ähli bilim edaralarynda berilýän bilimiň üznüksizligi hem-de arabaglanyşygy üpjün edildi. Şeýle-de bilimli, ylymly, watansöýüji şahsyýetleri kemala getirmäge, okatmagyň hilini, bilimiň mazmunyny halkara ülňülere laýyk getirmäge, pedagogik işgärleri taýýarlamagyň gerimini giňeldip, mugallymlaryň hünär bilimlerini çuňlaşdyrmaga gönükdirilen işleriň uly tapgyry durmuşa geçirildi. Şunuň bilen birlikde, hormatly Prezidentimiziň Karary bilen tassyklanan «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyna» laýyklykda, täze okuw ýylyndan başlap, okatmagyň usulyýetiniň milli tejribä we halkara bilim standartlaryna laýyklykda has-da döwrebaplaşdyryljakdygyna aýratyn üns çekildi. Biz hem maslahata gatnaşan mugallymlardyr terbiýeçileriň käbiri bilen söhbetdeş bolup, olaryň ýürek buýsançlaryny okyjylarymyza ýetirmegi makul bildik.
Aýgözel ÖWEZOWA,
Türkmenistanyň Daşary işler ministrliginiň Halkara gatnaşyklary institutynyň mugallymy:
— Täze taryhy döwrümizde ylym-bilim ulgamy döwletimiziň diňe bir içeri syýasatynda däl-de, eýsem, daşary syýasy gatnaşyklarynda hem iň bir ileri tutulýan ugur hökmünde kesgitlenildi. Çünki islendik bir ýurduň ösen milli ylym-bilim ulgamyny dünýä ülňülerinden üzňe göz öňüne getirmek mümkin däl. Biz hem döredilýän giň mümkinçiliklerden peýdalanyp, innowasion tehnologiýalara esaslanyp, geljekki halkaraçy hünärmenlere daşary ýurt dillerini, aýratyn hem, iňlis dilini çuňňur öwretmäge, bilim işine täzeçil usullary ornaşdyrmaga, diplomatiýanyň dürli ugurlaryna degişli ylmy gözlegleri alyp barmaga möhüm ähmiýet berýäris. Bilim işgärlerine öz hünärleriniň hakyky eýesi bolmak we ýaşlara kämil bilim-terbiýe bermek üçin ähli mümkinçilikleri döredip berýän Gahryman Arkadagymyza hem-de Arkadagly Gahryman Serdarymyza alkyşlarymyz egsilmezdir.