Institutyň gözli şaýady
Ol ýene-de bir ýerlere howlugyp barýar. Şeýle pursatlar ondan: «Beýle howlukmaç nirä barýaň?!» diýip sorasaň, hemişe ýylgyryp, «duşuşyga» diýip jogap berýär. Biz-ä oňa öz ýanymyzdan «ýatlamalaryň kolleksioneri» diýip ýüzlenýäs. Diýmezçe-de däl. Onuň «gözünde» galýan pursatlar hakyda ýazgysyna baky ýazylýar. Hawa, gürrüň Halkara žurnalistikasy fakultetiniň 2-nji ýyl talyby, institutymyzyň okuw studiýasynyň operatory Serdar Borjakow hakynda barýar.
Elkyssa, habary kimden al, eşidenden däl-de, görenden diýleni. Serdar Borjakow institutymyza degişli bolup geçýän ähli köpçülikleýin çäreleri, duşuşyklary ýazga geçirýär. Söhbedimiziň küle ýeri, ol biziň talyplygymyzy wideoşekillerde ebedileşdirýär. Kämahallar ol: «Oglanlar, ýyllar geçip, institutymyzyň wideoýazgylarynda öz ýaşlygyňyzy, talyplygyňyzy görüp, maňa sag bolsun aýdarsyňyz, ýazgylarda siz bir ömür juwan bolup galarsyňyz» diýip degişýär.
Serdar Borjakow asyl, tebigaty boýunça hem ýumşakdan degişgen oglan. Ol çärelerde talyplary ýazgy edýän pursatlary olara: «Hany, özüňizi timarlaň, men sizi telewideniýäniň ýyldyzy etmekçi» diýip degişmeli ýüzlenýär. Bir gün hem şeýle çäreleri ýazgy edende şekile düşen talyplaryň birini teleýaýlymda ýurdumyzyň çet obasynda ýaşaýan maşgalasy görýär. Perzendini teleýaýlym arkaly ilkinji gezek synlaýan ene begençli gözýaşlaryny saklap bilmeýär. Hälki talyp Serdar Borjakowyň ýanyna gelip, ähli bolan zatlary gürrüň berip, sag bolsun aýdýar. Serdardan bu hakynda soranyňda: «Edýän işimiz eneleri begendirip bilýän bolsa, armanymyz näme!» diýip buýsançly jogap berýär.
Serdar Borjakow Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetine okuw giren günlerinden operatorçylyk bilen ýakyndan gyzyklanyp başlaýar. «Yhlaslynyň ýary Taňry» diýlişi ýaly, oňa bu işi gowy öwrenmekde institutyň talyplary Döwletgeldi Borjakow, Amangeldi Ýegenow dagy ýakyndan ýardam edýär. Halkara žurnalistikasy fakulteti döredijilik bilen dem alansoň, bu ýerde hatda talyplaryň arasynda hem halypa-şägirtlik ýörelgesi ýola goýlandyr. Çünki fakultetde owaldan metbugatda, telewideniýede zähmet çekip ýören talyplar bar. Olar degişli ugrundan höwes edýän ýaş oglandyr gyzlara halypalyk edýär. Şeýde-şeýde ýodalar ýola öwrülýär. Bu günki gün Serdar Borjakow okuwyndan boş wagtlary «Türkmenistan» teleýaýlymynyň operatory bolup zähmet çekýär.
Serdardan «Ýazga geçirýän gepleşikdir taslamalaryňdan seniň üçin iň täsirlisi haýsy?!» diýip soranyňda, ol bada-bat: «Parahatçylygyň ýaş çaparlary» atly akyl-paýhas bäsleşigi diýip jogap berýär. Ol: «Bu bäsleşik — üýtgeşik meýdança. Onda zehin bilen zehin, taryh bilen şu gün didarlaşýar. Şeýle duşuşygyň gözli şaýady bolmagam meniň üçin uly nesibe» diýýär.
«Mekdep okuwçylarynyň bäsleşigiň dowamynda sowallara jogap bermek üçin oýlanyp duruşlary, ýeňiji bolanlarynda buýsançdan ýaňa çar ýana seredip, begenýän pursatlary — aýratyn bir sungat eseri. Operator üçin şeýle pursatlary ýazga geçirmek uly lezzet» diýip, Serdar Borjakow özüne bäsleşikden ýeten täsirleri paýlaşýar.
...Türkmenistanyň Daşary işler ministrliginiň Halkara gatnaşyklary institutynyň talyplarynyň hersi bir ýagşy işiň başynda. Ýokary okuw mekdebimiziň çäginde ýaşlaryň okuwdan daşary gyzyklanýan ugurlary boýunça hem kämilleşmekleri üçin ähli şertler döredilendir. Institutymyzda Serdar Borjakow ýaly yhlasly talyplaryň bardygy aýratyn buýsançly. Biz olara yhlasyňyz myrat tapsyn diýýäris!
Gurbansähet GURBANSÄHEDOW,
Halkara žurnalistikasy fakultetiniň 3-nji ýyl talyby.