Hormatly Prezidentimiz Täjigistanda geçiriljek Merkezi Aziýa döwletleriniň Baştutanlarynyň bäşinji Konsultatiw duşuşygyna gatnaşar
2023-nji ýylyň 14-15-nji sentýabry aralygynda Täjigistan Respublikasynyň paýtagty Duşenbe şäherinde Merkezi Aziýa döwletleriniň Baştutanlarynyň bäşinji Konsultatiw duşuşygy geçiriler. Bu duşuşyga Arkadagly Serdarymyz hem gatnaşar. Merkezi Aziýa döwletleriniň Baştutanlarynyň bäşinji Konsultatiw duşuşygynyň çäklerinde, ýagny 2023-nji ýylyň 13-nji sentýabrynda Merkezi Aziýa döwletleriniň daşary işler ministrleriniň duşuşygy geçiriler. Mundan başga-da, Merkezi Aziýa döwletleriniň önüm öndürijileriniň sergisi, ykdysady forum, ýokary okuw mekdepleriniň rektorlarynyň ikinji forumy, ulag ministrleriniň birinji duşuşygy, Zenanlar dialogynyň agzalarynyň sebit duşuşygy, suratkeşleriň sergisi, milli tagamlaryň festiwaly, ýaşlar forumy, halkara ylmy-maslahat geçiriler. Bu geçiriljek maslahatlara ýurdumyzyň degişli pudaklarynyň ýolbaşçylary we wekilleri gatnaşar. Duşuşygyň dowamynda Merkezi Aziýa döwletleriniň dürli pudaklarynyň arasynda täze hyzmatdaşlyklar ýola goýular.
Duşuşygyň jemleri boýunça döwlet Baştutanlarynyň bilelikdäki Beýannamasy kabul ediler. Şeýle hem birnäçe:
* Merkezi Aziýa döwletleriniň Baştutanlarynyň bilelikdäki beýanaty;
* Merkezi Aziýada ýerüsti ulag arabaglanyşygyny güýçlendirmek üçin şertnama;
* Ýaşlar syýasaty boýunça sebitiň ýurtlarynyň arasyndaky ylalaşyk;
* Konsultatiw duşuşyklar boýunça milli utgaşdyryjylar geňeşiniň düzgünnamasy;
* Bütindünýä Saglygy Goraýyş Guramasy bilen hyzmatdaşlykda işlenip düzülen
2023-2025-nji ýyllar üçin sebitiň saglygy we abadançylygyny goldamak boýunça ýol kartasyny tassyklamak ýaly möhüm meselelere serediler. Şeýle hem ýokary derejedäki sammitiň dowamynda ýene-de bir möhüm duşuşyk, ýagny Araly halas etmegiň Halkara gaznasyny esaslandyryjy döwletleriň Baştutanlarynyň Sammiti geçiriler.
Ýeri gelende aýtsak, Türkmenistan bilen Täjigistan Respublikasynyň arasynda ençeme ýyllaryň dowamynda hoşniýetli dost-doganlyk gatnaşyklary alnyp barylýar. Sammit iki döwletiň ikitaraplaýyn we köptaraplaýyn derejede köpugurly hyzmatdaşlygy işjeň ösdürmäge, halkara guramalaryň çäklerinde netijeli gatnaşyklary pugtalandyrmaga ýardam eder.
Daşary syýasat strategiýasynda Merkezi Aziýa döwletleri bilen netijeli hyzmatdaşlygy ösdürmegi ileri tutýan Türkmenistan hem syýasy-diplomatik, söwda-ykdysady, medeni-ynsanperwer ulgamlarda özara bähbitli gatnaşyklary mundan beýläk-de pugtalandyrmak üçin birnäçe işler alyp barar.
Aýmyrat MUHAMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary hünäriniň I ýyl talyby.