Awazadaky geçirilen maýa goýum forumy — ykdysady galkynyşyň derwaýys şerti
Täze taryhy döwrümizde Gahryman Arkadagymyzyň hem-de hormatly Prezidentimiziň tagallalary bilen milli ykdysadyýetimiziň pudaklary durnukly ösüşe eýe bolýar. Şunda giň wekilçilikli işewürlik maslahatlarynyň, maýa goýum forumlarynyň guralmagy bilen, ýurdumyzyň ykdysady kuwwaty, senagat, maýa goýum mümkinçilikleri, olardan netijeli peýdalanmak babatda alnyp barylýan işleriň gerimi giňden açylyp görkezilýär. Bu bolsa ykdysady we önümçilik taslamalaryna daşary ýurt maýadarlaryny çekmekde örän netijelidir. Şoňa görä-de, 2025-nji ýylyň 18-19-njy sentýabrynda «Awaza» milli syýahatçylyk zolagynda Türkmenistanyň ykdysadyýetine daşary ýurt maýa goýumlaryny çekmek boýunça halkara forumyň geçirilmegi möhüm ähmiýete boldy.
Döwlet Baştutanymyzyň halkara foruma gatnaşyjylara iberen Gutlagynda: «Awazada geçirilýän bu çäräniň Berkarar döwletiň täze eýýamynyň Galkynyşy döwründe sebitleri senagatlaşdyrmaga we durmuş-ykdysady taýdan has-da ösdürmäge, pudaklara häzirki zaman tehnologiýalaryny ornaşdyrmaga, sanly ykdysadyýet konsepsiýasyny işjeň durmuşa geçirmäge, maýa goýumlary çekmäge ýardam etjekdigine berk ynanýaryn» diýlip bellenilýär. Munuň özi Garaşsyz, hemişelik Bitarap Watanymyzyň ykdysadyýetiniň ýokary depginde ösmegini üpjün etmek we işjeň maýa goýum syýasatyny alyp barmak ugrunda tutumly işleriň amala aşyrylmagyny şertlendirýär.
Berkarar döwletiň täze eýýamynyň Galkynyşy döwründe daşary ýurt maýa goýumlarynyň çekilmegi bilen amal edilýän maýa goýum taslamalary barha artýar. Şu jähetden, bu halkara forumyň esasy maksady okgunly ösýän milli ykdysadyýetimiziň ileri tutulýan ugurlaryny hasaba almak bilen, bu ugurda hyzmatdaşlygy ösdürmegiň geljegini ara alyp maslahatlaşmakdan, kärhanalaryň, guramalaryň, kompaniýalaryňdyr maliýe düzümleriniň arasynda işewürlik gatnaşyklaryny we göni hyzmatdaşlygy ýola goýmak üçin geljekki maýadarlary, gyzyklanma bildirýän taraplary bu işe çekmekden, döwletimiziň işewürlik abraýyny pugtalandyrmakdan ybaratdyr.
Foruma öňdebaryjy daşary ýurt korporasiýalary, iri halkara we sebit guramalary, maliýe edaralary, maslahat beriş hem-de reýting agentlikleri, halkara bilermenler gatnaşýarlar. Şeýle hem 45 sany ýurduň 800 wekilleriniň foruma gatnaşmaga gelendigi çäräniň geriminiň örän giňdiginiň, daşary ýurtly hyzmatdaşlaryň Türkmenistana uly gyzyklanma bildirýändikleriniň aýdyň mysalydyr. Bu forum maliýe serişdeleri üçin ileri tutulýan pudaklary kesgitlemäge, innowasion teklipler bilen tanyşdyrmaga amatly mümkinçilikleri döretdi.
Onuň çäklerinde energetika diplomatiýasynda ýurdumyzyň eýeleýän orny hem-de onuň sebit durnuklylygyna we howpsuzlygyna täsiri ara alnyp maslahatlaşyldy. Şeýle hem forumyň maksatnamasynyň çäklerinde «Türkmenistanda ygtybarly ulag-kommunikasiýa infrastrukturasynyň ösüşi. Ulag-logistika ulgamyna maýa goýumlar», «Howanyň üýtgemegine durnukly oba hojalygy we gaýtadan işleýän oba hojalyk senagatyna maýa goýumlar», ýaly ugurlar boýunça pikir alyşmalar geçirildi.
Şeýlelikde, dünýäde ösüp barýan ykdysadyýeti bilen tanalýan Hazar deňziniň kenaryndaky «Awaza» milli syýahatçylyk zolagynda guralan bu halkara forum ýurdumyzyň önümçilik kuwwatlyklaryny, eksport mümkinçiliklerini artdyrmak boýunça milli taslamalary amala aşyrmakda, Türkmenistany dünýä derejesinde harytlary ibermekde bäsdeşlige ukyply döwlet hökmünde görkezmekde uly ähmiýete eýedir. Munuň özi Gahryman Arkadagymyz tarapyndan binýady goýlup, hormatly Prezidentimiziň parasatly baştutanlygynda alnyp barylýan ykdysady strategiýanyň has-da rowaçlanýandygynyň nobatdaky beýanydyr.
Sülgün NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy.