ÝAŞ WAGYZÇYLAR BILEN OKUW SAPAGY GEÇIRILDI
2025-nji ýylyň 18-nji aprelinde Türkmenistanyň Daşary işler ministrliginiň Halkara gatnaşyklary institutynda şu ýylyň 4 — 8-nji awgustynda «Awaza» milli syýahatçylyk zolagynda geçiriljek Birleşen Milletler Guramasynyň Deňze çykalgasy bolmadyk ösüp barýan döwletleriň III maslahatyna bagyşlanan okuw sapagy geçirildi. Bu okuw sapagyna ähli ýokary okuw mekdepleriniň mugallymlarydyr talyp ýaşlaryndan saýlanan ýaş wagyzçylar gatnaşdylar.
Okuw sapagyny Türkmenistanyň Daşary işler ministrliginiň Halkara gatnaşyklary institutynyň Strategik barlaglar boýunça ylmy merkeziniň uly mugallymy, filologiýa ylymlarynyň kandidaty B.Amansaryýew alyp bardy. Ol iri halkara forumlardyr maslahatlar barada habarlary, makalalary, interwýulary dessin köpçülikleýin habar beriş serişdelerinde şöhlelendirmekde žurnalistikanyň tutýan orny we ähmiýeti dogrusynda giňişleýin gürrüň berdi. Şeýle-de okuw sapagynyň dowamynda delilleriň, umumylaşdyrmalaryň we netijeleriň has içgin öwrenilmeginiň, wakanyň mazmunyna we ähmiýetine çuňňur düşünmegiň zerurdygyny belläp, bu babatda ýaş wagyzçylara seljerme žanrynyň ýörelgeleriniň wajyplygyny düşündirdi.
Gurbansähet GURBANSÄHEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.