Žurnalistika bagyşlanan okuw maslahaty
2021-nji ýylyň 10-12-nji noýabry aralygynda Türkmenistanyň Daşary işler ministrligi bilen Ýewropada Howpsuzlyk we Hyzmatdaşlyk Guramasynyň (OSCE) Aşgabatdaky Merkeziniň gurnamagynda sanly wideoaragatnaşyk arkaly “Žurnalistika bilimini ýokarlandyrmakda we žurnalistleriň hünär taýýarlygynda kömek” atly taslamasynyň çäklerinde okuw maslahaty geçirildi. Bu okuw maslahaty ÝHHG bilen bilelikde ýerine ýetirilýän ýyllyk meýilnamasynyň çäklerinde milli habar beriş serişdeleriniň wekilleriniň žurnalistika ugurda hünär derejesini ýokarlandyrmak maksady bilen geçirildi. Bu okuw maslahatyna daşary ýurtly bilermenler bilen Türkmenistanyň Daşary işler ministrliginiň, Türkmenistanyň Saglygy goraýyş we derman senagaty ministrliginiň, Türkmenistanyň Daşary işler ministrliginiň Halkara gatnaşyklary institutynyň, Magtymguly adyndaky Türkmen Döwlet uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň Döwlet habarlar agentligi hem-de ýurdumyzyň köpçülikleýin habar beriş serişdeleriniň wekilleri gatnaşdylar.
Okuw maslahatynyň dowamynda çykyş edenler köpçülikleýin habar beriş serişdeleriniň wekilleriniň hünär derejesini ýokarlandyrmagyň häzirki zaman maglumat jemgyýetiniň talaplaryny ýerine ýetirmekde aýratyn ähmiýetlidigini bellediler. Maslahatyň çäginde jemgyýeti dessine maglumatlandyrmakda sanly ulgamyň mümkinçiliklerini giňden peýdalanmak barada pikir alyşmalar boldy. Maslahata gatnaşyjylar žurnalistika bilimini ýokarlandyrmak hem-de köpçülikleýin habar beriş serişdeleriniň wekilleriniň hünär derejesini kämilleşdirmek hakynda täsirli çykyşlary etdiler.
Mähriban GANDYMOWA,
Türkmenistanyň Daşary işler ministrliginiň
Halkara gatnaşyklary institutynyň mugallymy.