Zehinli talybyň üstünligi
Aşgabat şäheriniň 140 ýyllygy mynasybetli ýokary okuw mekdepleriniň talyplarynyň arasynda paýtagtymyzyň gözelligini çeper beýan etmek, talyp ýaşlarda öz kärine bolan höwesini, döredijilik ukybyny artdyrmak, fotožurnalistika žanryny ösdürmek maksady bilen Halkara ynsanperwer ylymlary we ösüş uniwersitetiniň gurnamagyndaky “Aşgabat – gözelligiň mekany” atly fotožurnalistika we düzme ýazmak boýunça bäsleşikleriň jemleri jemlendi. Bäsleşiklere ýurdumyzyň ýokary okuw mekdepleriniň talyplary ak şäherimiziň ajaýyp keşbini açyp görkezýän fotosuratlary, çeper ýazylan düzmeleri bilen gatnaşdylar.
Yglan edilen iki bäsleşigiň hem netijelerine görä, emin agzalary tarapyndan toplanan ballaryň jemi boýunça Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary fakultetiniň 1-nji ýyl talyby Baýnazar Nepesow 1-nji orna mynasyp bolmagy başardy. Talybymyzyň bu gazanan üstünligine institutymyzyň mugallymlarydyr talyplarynyň buýsanjy çäksizdir.
Gyzlargül ANNAGURDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.