Zähmet – terbiýäniň başy
2021-nji ýylyň 22-nji oktýabrynda Türkmenistanyň Daşary işler ministrliginiň Halkara gatnaşyklary institutynda hormatly Prezidentimiziň Bilimler we talyp ýaşlar güni mynasybetli geçiren ilkinji umumy okuw sapagynda “Halkymyzyň rysgaly ene topragymyzda” diýip aýdan jümlesine bagyşlanan okuw maslahaty geçirildi. Maslahata S.A.Nyýazow adyndaky Türkmen oba hojalyk uniwersitetiniň mugallymlary we talyp gyzlary hem-de Aşgabat şäheriniň 45-nji orta mekdebiniň mugallymy, institutymyzyň mugallymlary we talyplary gatnaşdylar.
Maslahatda çykyş edenler hormatly Prezidentimiziň “Garaşsyzlyk – bagtymyz” atly kitabynyň içinden eriş-argaç bolup geçýän ýurdumyzyň ösüşleri, ykdysady kuwwaty, nesilden-nesle geçip gelýän milli gymmatlyklarymyzyň täze röwüşde janlanmagy barada täsirli gürrüňleri berdiler. Şeýle hem, çykyşlarda halk hojalygynyň ähli pudaklarynyň ösen döwründe zenanlaryň hukuklary we mümkinçilikleri, olaryň zähmet we hünär derejelerini we jemgyýetçilik işjeňligini ýokarlandyrmak ugrunda alnyp barylýan işler dogrusynda hem-de agzybirlikde, maşgala ojagyňa wepalylykda, ululara hormat goýmakda we kiçini sylamakda zenanlaryň tutýan orny barada hem aýratyn bellenildi.
Maslahatyň dowamynda çykyş edenler ene topragyň enä deňelmeginiň özünde aýratyn bir mukaddesligiň bardygy barada durup geçmek bilen talyp gyzlara mahsus bolan päk ahlaklylyk, zähmetsöýerlik, arassaçylyk ýaly häsiýetleri özlerinde jemlemegiň ähmiýetini dürli mysallara ýüzlenip gürrüň berdiler.
Jennet OMAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.