“ÝOL HEREKETINIŇ HOWPSUZLYGY – ÖMRÜMIZIŇ RAHATLYGY” ATLY WAGYZ-NESIHAT ÇÄRESI GEÇIRILDI
2025-nji ýylyň 8-nji sentýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň hukuk goraýjy edaralarynyň işgärleri bilen “Ýol hereketiniň howpsuzlygy – ömrümiziň rahatlygy” atly wagyz-nesihat çäresi geçirildi. Oňa Türkmenistanyň Daşary işler ministrliginiň Halkara gatnaşyklary institutyň ylmy işleri boýunça prorektory Begenç Mätliýew, Türkmenistanyň Mejlisiniň deputaty, Mejlisiň Halkara we parlamentara gatnaşyklary baradaky komitetiň agzasy Merdan Tuwakow, Türkmenistanyň Baş prokuraturasynyň Kämillik ýaşyna ýetmedikler we ýaşlar hakyndaky kanunlaryň ýerine ýetirilişine gözegçilik bölüminiň uly prokurory, 1-nji derejeli ýurist Allamyrat Amandurdyýew, Türkmenistanyň Içeri işler ministrliginiň Polisiýanyň ýol gözegçiligi müdirliginiň 4-nji bölüminiň aýratyn tabşyryklar boýunça uly gözegçisi, polisiýanyň podpolkownigi Juma Pygyýew, Türkmenistanyň Içeri işler ministrliginiň Jenaýat agtaryş müdirliginiň wekili, polisiýanyň maýory Serdar Akmämmedow, Türkmenistanyň Içeri işler ministrliginiň Derňew müdirliginiň 2-nji bölüminiň AMTB-ça uly gözegçisi, polisiýanyň maýory Azat Saparjaýew, Türkmenistanyň Magtymguly adyndaky Ýaşlar guramasynyň Bagtyýarlyk etrap geňeşiniň başlygy Ismaýil Ýakubow, Aşgabat şäheriniň Bagtyýarlyk etrap kazyýetiniň kazysynyň kömekçisi Röwşen Maksudow şeýle hem institutymyzyň mugallymlary we talyplary gatnaşdylar.
Çärede çykyş edenler türkmen halkynyň Milli Lideri Gahryman Arkadagymyzyň başlangyjy bilen 2013-nji ýylda badalga berlen “Ýol hereketiniň howpsuzlygy – ömrümiziň rahatlygy” atly şygar bilen geçirilýän bir aýlygyň dowamynda giň möçberli çäreleriň, wagyz-nesihat duşuşyklaryň yzygiderli geçirilýändigi, ýokary derejede geçirilýän çärelerde her bir raýatyň howpsuzlygyny üpjün etmek, ýol hereketiniň düzgünlerini berjaý etmek barada giňişleýin düşündiriş işleri alnyp barylýandygy barada nygtadylar. Her ýylyň 1-nji sentýabryndan 30-njy sentýabry aralygynda geçirilýän bu çäreler ýol-ulag hadysalarynyň azalmagyna, raýatlarymyzyň rahat hem-de abadan durmuşyny üpjün etmäge gönükdirilýändigini aýratyn bellediler.
Şeýle-de häzirki wagtda ýurdumyzdaky mekdep okuwçylarynyň, ýokary okuw mekdepleriniň talyplarynyň, edara-kärhanalaryň we jemgyýetçilik guramalaryň işgärleriniň ýoldaky hereketiniň köpelýändigini nazara alyp geçirilýän bu çäreleriň her bir adamyň, esasan-da, mekdep okuwçylarynyň we talyp ýaşlaryň köpçülik ýerlerinde we ýol hereketlerinde seresap bolmaklaryny, şahsy howpsuzlygyny üpjün etmegiň düzgünlerini öwrenmeklerinde wajypdygyny aýtdylar. Şu maksatly geçirilýän çäreleriň ýaşlary terbiýelemekde uly ähmiýetiniň bardygyny bellediler.
Seýran MAGSADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 2-nji ýyl talyby.