Ylmy işleri kämilleşdirmek boýunça özara maslahat geçirildi
Hormatly Prezidentimiziň düýpli we amaly ylmy ösdürmek, onuň mümkinçiliklerini pugtalandyrmak boýunça durmuşa geçirýän täzeçillikli syýasaty netijesinde möhüm ylmy-tehnologik işläp taýýarlamalaryň hil taýdan täze ugurlaryny döretmek boýunça üstünlikli işler alnyp barylýar, adam maýasyny kemala getirmek, zehinli ýaşlary ýokary tehnologiýalar ulgamyna çekmek üçin zerur işler durmuşa geçirilýär.
Ýurdumyzyň bilim edaralarynda aspirantlar, doktorantlar, ýaş alymlar we magistrantlar üçin yzygiderli okuw maslahatlary geçirilýär. Dünýäniň öňdebaryjy tejribesi bilen tanyşdyrmak, gözýetimini giňeltmek, hünär derejesini kämilleşdirmek, innowasion tehnologiýalary özleşdirmek maksady bilen, olar üçin daşary ýurtlaryň öňdebaryjy ylmy merkezlerinde hünärmenleriň hünärini ýokarlandyrmak boýunça okuwlar hem geçirilýär.
Türkmenistanyň Prezidentiniň 2021-nji ýylyň 9-njy iýulynda çykaran kararyna laýyklykda, Türkmenistanyň Daşary işler ministrliginiň Halkara gatnaşyklary institutynda Magistr maksatnamasynyň açylmagy hem ýurdumyzda ýaş hünärmenleriň ylym bilen meşgullanmaga we kämilleşmäge ýardam berer. Institutyň Halkara hukugy fakultetinde Halkara jemagat hukugy hem-de Halkara hususy hukugy ugurlary boýunça okuwlar alnyp barylýar.
2022-nji ýylyň 1-nji aprelinde Halkara jemagat hukugy hem-de Halkara hususy hukugy ugurlary boýunça okaýan magistrantlar bilen hem berkidilen temalar boýunça ýazan magistrlik dissertasiýalary barada Halkara hukugy we deňeşdirme hukuk öwreniş kafedrasynyň mugallymlary bilen bilelikde özara maslahat geçirildi. Magistrantlar ýazýan ylmy işleri boýunça aýratynlykda ýörite prezentasiýalary bilen çykyş etdiler. Çykyşlarda esasan hem ylmy işleriniň mazmunyny, täzeçilligini, derwaýyslygyny, onuň maksadyny hem wezipelerini takyk we aýdyň beýan etmek arkaly gürrüň berdiler. Olaryň arasynda G.Amanowyň “Halkara hukugynda ikitaraplaýyn maýa goýum şertnamalary (Türkmenistanyň tejribesi)”, Ş.Aşyrowanyň “Gozgalmaýan emläk babatyndaky kanunçylygynyň milli we halkara hukuk esaslary”, A.Tahyrowanyň “Milli we halkara hukugynda notarial edaralarynyň kanunçylyk binýadynyň kämilleşdirilişi”, S.Agaýewiň “Halkara hukugynyň kadalary we milli kanunçylyk: administratiw kanunçylygynyň mysalynda halkara hukuk başlangyçlary we tejribe” atly ylmy işleriniň mazmuny we ýerine ýetirilişi aýratyn bellärliklidir.
Halkara jemagat hukugynyň hem-de halkara hususy hukugynyň pudaklary bilen baglanyşykly ýazylýan ylmy işler geçirilýän özara maslahatlarda mugallymlaryň we magistrantlaryň işjeň gatnaşmagy, olaryň halkara hukugy boýunça bilimleriniň hem-de ýazýan ylmy işleriniň ähmiýetiniň has hem artmagyna we kämilleşmegine uly ýardam berýär.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň uly mugallymy.