Ylmy-amaly maslahat
2021-nji ýylyň 6-njy maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Konstitusiýasynyň we Türkmenistanyň Döwlet baýdagynyň güni mynasybetli “Türkmenistanyň konstitusion gurluşynyň esaslary” atly sanly wideoaragatnaşyk arkaly ylmy-amaly maslahat geçirildi. Bu maslahat Türkmenistanyň Prezidentiniň ýanyndaky Döwlet gullygy akademiýasynyň, Türkmenistanyň Daşary işler ministrliginiň Halkara gatnaşyklary institutynyň professor-mugallymlarynyň, ylmy işgärleriň, hünärmenleriň we diňleýjileriň gatnaşmagynda geçirildi.
Maslahatyň dowamynda Türkmenistanyň Daşary işler ministrliginiň Halkara gatnaşyklary institutynyň mugallymy, filosofiýa ylymlarynyň kandidaty Ogulgurban Ezimowa “Türkmenistanyň ekologiýa syýasatynyň esasy ýörelgeleri” atly tema boýunça çykyş etdi. O. Ezimowa öz çykyşynda “Altyn asyr” Türkmen kölüniň döredilmegi, öri meýdanlaryň peýdalanylyşynyň kadalaşdyrylmagy hem-de birnäçe beýleki çäreler ýurdumyzda ekologiýa ýagdaýynyň gowlandyrylmagyna oňyn täsir etdi diýip belläp geçdi.
Dünýägözel ÇARYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasynyň II ýyl talyby.