Ylmy-amaly maslahat geçirildi
Türkmenistanyň Ylymlar akademiýasynyň we Türkmenistanyň Bilim ministrliginiň 2024-nji ýylyň 24-nji fewralyndaky 15/56 belgili bilelikdäki buýrugy bilen tassyklanan “Ýokary hünär bilimi edarasynda ylmy çäreleri geçirmegiň tertibi” boýunça talaplary ýerine ýetirmek maksady bilen, 2025-nji ýylyň 28-nji noýabrynda Türkmenistanyň Daşary işler ministrliginiň Halkara gatnaşyklary institutynyň “Galkynyş” otagynda “Daşary ýurt dillerini öwretmegiň öňdebaryjy usullary arkaly milli bilimi kämilleşdirmegiň tärleri” atly ylmy-amaly maslahat geçirildi.
Bu maslahata ABŞ-nyň Türkmenistandaky ilçihanasyndan institutymyzda zähmet çekýän meýletinçi mugallym Joşua Tilton we Dünýä dilleri kafedrasynyň mugallymlary gatnaşdylar. Ylmy-amaly maslahaty Joşua Tilton gutlag sözleri bilen açyp, maslahatyň şowly geçmegine üstünlikler arzuw etdi. Ol “Daşary ýurt dillerini öwretmegiň işjeň usullary we olary milli bilime ornaşdyrmagyň tärleri” temasyndan çykyş etdi. Soňra Dünýä dilleri kafedrasynyň uly mugallymy Çemen Baýryýewa “Iňlis dilini öwretmekde milli bilimi ösdürmegiň wajyp meseleleri” temasyndan çykyş etdi. Şeýle-de, şol kafedranyň mugallymy Annamyrat Jumaýew “Sözleýiş dilini ösdürmegiň möhüm ugurlary” barada çykyş etdi. Çykyşlaryň ahyrynda mugallymlar özlerini gyzyklandyrýan soraglar boýunça sorag-jogap alyşdylar.
Bu geçirilen ylmy-amaly maslahat daşary ýurt dillerini okadýan mugallymlaryň iş tejribesini artdyrmaga, täze usullar arkaly okuw sapaklarynyň okadylyşynyň hilini gowulandyrmaga ýardam eder.
Maýa ATAJANOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň uly mugallymy.