Ykjam žurnalistika we «akylly» telefonlarda media kontentini döretmek boýunça tejribelik okuw sapagy
2025-nji ýylyň 16-17-nji aprelinde Ýewropada Howpsuzlyk we Hyzmatdaşlyk Guramasynyň Aşgabatdaky Merkezinde ykjam žurnalistika we «akylly» telefonlarda media kontentini döretmek boýunça tejribelik okuw sapagy geçirildi. Oňa Türkmenistanyň Döwlet habarlar agentliginiň, Daşary işler ministrliginiň elektron gazetiniň, žurnalistika hünäri boýunça bilim berýän ýokary okuw mekdepleriň mugallymlary, şeýle-de köpçülikleýin habar beriş serişdeleriniň wekilleri gatnaşdylar.
Okuw sapagynda, ilki bilen, Ýewropada Howpsuzlyk we Hyzmatdaşlyk Guramasynyň Aşgabatdaky Merkeziniň ýolbaşçysy, ilçi Jon MakGregor çykyş etdi. Ol häzirki zaman žurnalistikasyndaky özgerişler, okyjylary gyzyklandyrmagyň ugurlary, döwrebap media serişdeleri, şeýle hem ykjam žurnalistika dogrusynda öz garaýyşlaryny paýlaşdy. Şeýle-de okuw sapaklaryny täjigistanly halkara bilermen Jamşed Marupow, russiýaly hünärmen Ýuriý Zwýaginsew geçdiler. Olar žurnalistika hünärini kämilleşdirmekde sanly ulgamyň ähmiýeti, habarlary we wakalary dessin halka ýetirmekde ykjam ýa-da «akylly» telefonlaryň ýerine ýetirýän wezipeleri, olary dogry ulanmagyň ýollary dogrusynda öz tejribelerine esaslanyp, giňişleýin gürrüň berdiler. Şol bir wagtyň özünde-de gatnaşyjylaryň gyzyklanýan sowallaryna mysallar arkaly jogap berdiler.
Tejribelik okuw sapaklarynyň ahyrynda oňa gatnaşyjylara Ýewropada Howpsuzlyk we Hyzmatdaşlyk Guramasynyň Aşgabatdaky Merkezi tarapyndan şahadatnamalar gowşuryldy.
Oguloraz EÝEBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti kafedrasynyň
uly mugallymy.