“ÝEWROPA BILELEŞIGI ─ MERKEZI AZIÝA” ONLAÝN OKUW SAPAGYNYŇ BIRINJI TAPGYRY GEÇIRILDI
2026-njy ýylyň 16-njy fewralynda Ýewropa Bileleşiginiň Türkmenistandaky wekilhanasynyň guramagynda Ýewropa Bileleşigi we onuň Merkezi Aziýa bilen hyzmatdaşlygy barada okuw maksatnamasy boýunça “Ýewropa syýasatynyň ýaýbaňlandyrylmagy” atly onlaýn okuw sapagynyň birinji tapgyry geçirildi. Bu okuw sapagyna Gazagystanyň, Özbegistanyň, Täjigistanyň hem-de Türkmenistanyň wekilleri gatnaşdylar.
Bu onlaýn okuw sapagynyň geçirilmeginiň esasy maksady Ýewropa Bileleşiginiň hereket edişi, onuň daşary, howpsuzlyk, söwda syýasaty, Merkezi Aziýa babatyndaky syýasaty bilen tanyşmak bolup durýar. Onlaýn okuw sapagynda Ýewropa Bileleşiginiň hünärmenleri esasan, Ýewropa Bileleşiginiň alyp barýan işi we onuň Merkezi Aziýa bilen hyzmatdaşlygy barada giňişleýin gürrüň berdiler.
Ýewropa Bileleşiginiň Türkmenistandaky wekilhanasynyň guramagynda geçirilen bu onlaýn okuw sapagynyň ahyrynda oňa gatnaşyjylara berlen maglumatlar esasynda ýumuşlar berlip, sorag-jogap alşyldy hem-de indiki geçiriljek ikinji onlaýn okuw sapagyna degişli maglumatlar berildi.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň uly mugallymy.