“Ýeňme” jemgyýetçilik guramasynyň yglan eden bäsleşiginiň ýeňijileri
2021-nji ýylyň 6-njy dekabrynda “Ýeňme” jemgyýetçilik guramasynyň 3-nji dekabr — Halkara maýyplar güni we 10-njy dekabr — Adam hukuklarynyň Halkara güni mynasybetli “Biz dünýäni eşidýäris, dünýä hem bizi eşidýär” atly düzme bäsleşiginiň jemi jemlenip, ýeňijilere baýrak gowşurylyş dabarasy geçirildi.
Bu ýaryşa Türkmenistanyň ähli künjeginden 14 ýaşdan geçen, okuwçylar, talyplar, dürli ulgamda zähmet çekýän işgärler we raýatlar gatnaşdylar. Olar Halkara maýyplar güni we Adam hukuklarynyň halkara güni bilen baglanyşykly özleriniň oý-pikirlerini, duýgularyny we döredijiligini beýan edýän düzmelerini hödürlediler. Has tapawutlananlary bolsa 1-nji, 2-nji we 3-nji orunlara mynasyp bolup, jemgyýetçilik guramanyň Hormat hatlary we ýadygärlik sowgatlary bilen sylaglandylar.
Türkmen diplomatiýasynyň milli mekdebiniň talyplarynyň hem birnäçesi bu bäsleşige gatnaşyp, institutyň Halkara hukugy fakultetiniň 4-nji ýyl talyby Jahan Öräýewa 2-nji orna, şeýle-de şol fakultetden gatnaşan talyplar höweslendiriji baýraklara mynasyp boldular. “Ýeňme” jemgyýetçilik guramasynyň yglan eden bäsleşigi Halkara maýyplar gününiň ähmiýetini artdyrmak, jemgyýetiň mümkinçiligi çäkli adamlar baradaky düşünjesini giňeltmek maksady bilen geçirildi. Baýrak gowşurylyş dabarasyna Ýewropa Bileleşiginiň Ilçisiniň orunbasary, Birleşen Milletler Guramasynyň Adam hukuklary boýunça wekili, “Ýaşyl şöhle” hem-de “Ýeňme” jemgyýetçilik guramalarynyň wekilleri we žurnalistler gatnaşdylar.
Dabaranyň ahyrynda oňa gatnaşanlar adam hukuklarynyň ileri tutulýan ýurdunda mümkinçiligi çäkli her bir adamyň hukuklary goralyp, olaryň durmuş üpjünçiliginiň ileri tutulmagy barada birnäçe işleri alyp barýandygy üçin hormatly Prezidentimize köp sagbolsun aýtdylar.
Atajan ROZYBAÝEW,
Türkmenistanyň Daşary işler ministrliginiň
Halkara gatnaşyklary institutynyň 4-nji ýyl talyby.