Ýeňiş gününe bagyşlanan dabaraly ýöriş
2023-nji ýylyň 9-njy maýynda Türkmenistanyň Prezidenti Serdar Berdimuhamedow 1941 — 1945-nji ýyllaryň Beýik Watançylyk urşunda gazanylan Ýeňşiň hormatyna Russiýa Federasiýasynyň paýtagty Moskwa şäheriniň Gyzyl meýdançasynda geçirilen dabaraly harby ýörişe gatnaşdy. Ýeňiş güni mynasybetli guralan çärelere Belarus Respublikasynyň, Gazagystanyň, Gyrgyz Respublikasynyň, Täjigistanyň, Özbegistanyň we Ermenistanyň ýokary derejeli wekiliýetleri hem gatnaşdylar.
Ýokary derejede geçirilen Ýeňiş ýörişi geçmişe gaýybana syýahat etmäge mümkinçilik berdi. Weteranlar üçin bu ýöriş geçmişini ýada salsa, ýaşlar üçin nägehan urşuň nähili bolandygyna, edermen pederlerimiziň nähili söweş ýoluny geçendigine göz ýetirmäge mümkinçilik berdi.
Döwlet Baştutanymyzyň halkymyza, uruş weteranlaryna Beýik Ýeňşiň 78 ýyllygy bilen iberen Gutlagynda belleýşi ýaly, watansöýüjilik, ynsanperwerlik, gaýduwsyzlyk, edermenlik türkmen halkynyň asyrlaryň dowamynda kemala gelen milli aýratynlyklaryna hem-de durmuş kadasyna öwrülen nusgalyk ýörelgeler bolup, olar dünýä taryhyna örän pajygaly, gandöküşikli, jebir-jepaly döwür hökmünde ebedi ýazylan 1941 — 1945-nji ýyllarda has-da aýdyň ýüze çykdy.
Gyzyl meýdançadaky dabaraly harby ýöriş tamamlanandan soň, hormatly Prezidentimiz GDA-nyň döwlet Baştutanlary bilen bilelikde uruşda gahrymanlarça söweşip wepat bolan «Näbelli gahrymanyň» ýadygärligine gül goýmak dabarasyna gatnaşdy. Munuň özi il-ulsunyň parahat durmuşy üçin göreşen Watan gahrymanlarynyň hiç wagt unudylmaýandygynyň, olaryň halkyň ýüreginde baky ýaşaýandygynyň nobatdaky subutnamasy boldy.
Mahlasy, Ýeňiş gününde geçirilen dabaralar geçmişi aýrylmaz baglanyşykly bolan ýurtlaryň arasyndaky dost-doganlygynyň derejesini ýene bir gezek açyp görkezýän waka hökmünde taryha möhürlener. Türkmenistan — parahatçylyk söýüji, asuda ýurt. Hormatly Belent Serkerdebaşymyzyň çäksiz uly aladalary bilen türkmen halky dünýä halklarynyň abadançylygyna, dost-doganlygyna ýol açýan beýik milletdir. Şeýle bagtly günlere ýetiren Watan gahrymanlaryna ebedi şöhrat bolsun!
Ogulmaýsa AMANMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti
kafedrasynyň mugallymy.
Şeýle hem bu barada şu ýerden
okap bilersiňiz:
https://turkmenportal.com/tm/blog/61624
https://turkmenportal.com/tm/blog/61619
https://turkmenportal.com/tm/blog/61625
https://turkmenportal.com/tm/blog/61624