Ýeňijileri sylaglandyrmak dabarasy geçirildi
2025-nji ýylyň 21-nji noýabrynda Türkmenistanyň Döwlet medeniýet merkeziniň Döwlet muzeýinde Bitaraplygymyzyň 30 ýyllygy mynasybetli, Türkmenistanyň Magtymguly adyndaky Ýaşlar guramasynyň Aşgabat şäher Geňeşi bilen Türkmenistanyň Döwlet medeniýet merkeziniň Döwlet muzeýiniň bilelikde guramagynda ýurdumyzyň ýokary okuw mekdepleriniň talyplarynyň arasynda geçirilen “Türkmen halkynyň taryhy we medeni mirasy” atly bäsleşiginiň ýeňijilerini sylaglandyrmak dabarasy geçirildi.
Bäsleşigiň jemi jemlenip, iň ýokary netijeleri görkezen talyplar yglan edildi. Olaryň arasynda Türkmenistanyň Daşary işler ministrliginiň Halkara gatnaşyklary institutynyň II ýyl talyby Aýgözel Amanowa iň ýokary netijäni görkezip, baş baýragy eýeledi. Onuň bu üstünligi institutymyzyň talyplarynyň ukybynyň we ýokary biliminiň aýdyň subutnamasy boldy. Ýeňijiler Hormat haty we gymmat bahaly sowgatlar bilen sylaglandyryldy.
Bu bäsleşikler ýurdumyzyň ýokary okuw mekdepleriniň talyplarynyň arasynda giňden geçirilip, onda ýaşlarymyzyň milli mirasymyza bolan gyzyklanmasy we bilim derejesi has-da artýar.
Güljahan AMANBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Jemgyýeti öwreniş ylymlary kafedrasynyň mugallymy.