ÝAŞ WAGYZÇYLAR BILEN OKUW SAPAGY GEÇIRILDI
2025-nji ýylyň 30-njy aprelinde Türkmenistanyň Daşary işler ministrliginiň Halkara gatnaşyklary institutynda ýurdumyzda şu ýylyň 5–8-nji awgustynda «Awaza» milli syýahatçylyk zolagynda geçjek Birleşen Milletler Guramasynyň Deňze çykalgasy bolmadyk ösüp barýan döwletleriň III maslahatyna bagyşlanan okuw sapagy geçirildi. Bu okuw sapagyna ähli ýokary okuw mekdepleriniň mugallymlarydyr talyp ýaşlaryndan saýlanan ýaş wagyzçylar gatnaşdy. Okuw sapagyny «Dünýä edebiýaty» žurnalynyň baş redaktory R.Gylyjow alyp baryp, ol geljekki halkaraçy hünärmenleriň, ýurdumyzyň beýleki pudaklarynda zähmet çekýän ýaşlaryň halkara gatnaşyklarynda Türkmenistanyň hemişelik Bitaraplyk derejesiniň pugtalandyrylmagynda eýeleýän orny dogrusynda gürrüň etdi.
Okuw sapagynyň dowamynda Gahryman Arkadagymyzyň, Arkadagly Gahryman Serdarymyzyň tagallalary bilen döwletimiziň ýeten ykdysady sepgitleri aýratyn nygtalyp geçildi.
Suraý NAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.