ÝAŞ WAGYZÇYLAR BILEN OKUW SAPAGY GEÇIRILDI
2025-nji ýylyň 23-nji aprelinde Türkmenistanyň Daşary işler ministrliginiň Halkara gatnaşyklary institutynda ýurdumyzda şu ýylyň 4–8-nji awgustynda «Awaza» milli syýahatçylyk zolagynda geçjek Birleşen Milletler Guramasynyň Deňze çykalgasy bolmadyk ösüp barýan döwletleriň III maslahatyna bagyşlanan okuw sapagy geçirildi. Bu okuw sapagyna ähli ýokary okuw mekdepleriniň mugallymlarydyr talyp ýaşlaryndan saýlanan ýaş wagyzçylar gatnaşdy. Okuw sapagyny Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Demirýollary» açyk görnüşli paýdarlar jemgyýetiniň Aragatnaşyk we elektrik üpjünçiligi bölüminiň başlygynyň orunbasary, Aşgabat şäheriniň Halk Maslahatynyň agzasy Perman Allamyradow alyp bardy. Okuw sapagynyň dowamynda ol ulag-kommunikasiýalar toplumy islendik döwletiň ykdysadyýetiniň möhüm düzüm bölegidigini belläp, onuň ösüş depgini köp babatda tutuş ýurduň ösüşini kesgitleýändigini belledi. Türkmenistanyň iň döwrebap üstaşyr ulag, logistika düzümini tiz wagtda kemala getirmek nukdaýnazaryndan, ýurdumyzyň öňe sürýän başlangyçlary we anyk ädimleri diňe bir milli ykdysadyýetimiziň ösüşine däl, eýsem, sebitiň ösüşine hem kuwwatly itergi berýändigini nygtady.
Okuw sapagynyň dowamynda Gahryman Arkadagymyzyň, Arkadagly Gahryman Serdarymyzyň tagallalary bilen ulag-aragatnaşyk ulgamyny kämilleşdirmek babatda ýurdumyzda ýaýbaňlandyrylan giň gerimli işler halkymyzyň abadançylygyny ýokarlandyrmak baradaky alnyp barylýan syýasatyň ileri tutulýan ugrudygy aýratyn nygtalyp geçildi.
Gurbansähet GURBANSÄHEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.