“Ýaş diplomatlar” mekdebiniň agzalary bilen geçirilen okuw sapagy
2022-nji ýylyň 9-njy iýunynda Türkmenistanyň Daşary işler ministrliginiň Halkara gatnaşyklary institutynda “Ýaş diplomatlar” mekdebiniň agzalary üçin institutyň we Magtymguly adyndaky Türkmen döwlet uniwersitetiniň mugallymlarynyň alyp barmagynda okuw sapagy geçirildi.
Bu okuw sapagynda institutyň uly mugallymy, filosofiýa ylymlarynyň kandidaty Begenç Karaýew, Žurnalistikanyň nazaryýeti we amalyýeti kafedrasynyň mugallymy Mähriban Gandymowa, şeýle hem Türkmen döwlet uniwersitetiniň Psihologiýa kafedrasynyň mugallymy Sapargül Geldiýewa hemişelik Bitaraplyk syýasatynyň türkmen nusgasy we dünýä tejribesi, öňüni alyş diplomatiýasynyň taryhy we häzirki zaman tejribesi, hem-de özüňe bolan ynamy berkitmek, çylşyrymly pursatlarda psihiki durnuklylygy saklamak mowzuklaryna degişli giňişleýin maglumatlary berdiler.
Bu okuw sapagynyň dowamynda edilen çykyşlar okuwçylarda örän uly täsir galdyrdy hem-de okuwçylar özlerini gyzyklandyrýan sowallaryna jogap aldylar.
Şasoltan ARTYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.