ULAG DIPLOMATIÝASY OKUW MERKEZINDE OKUW SEMINARY GEÇIRILDI
2026-njy ýylyň 27-nji fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda «Merkezi Aziýa — Hytaý sammitleriniň ykdysady ähmiýeti» atly okuw seminary geçirildi. Okuw seminaryna institutyň halkara ykdysady gatnaşyklary fakultetiniň talyplary gatnaşdylar. Bu okuw seminaryny Türkmenistanyň Senagatçylar we Telekeçiler Partiýasynyň Aşgabat şäher komitetiniň ýanyndaky Ýaş Telekeçiler Merkeziniň utgaşdyryjysy, «Ak tagma» hojalyk jemgyýetiniň esaslandyryjysy Merdan Ataýew alyp bardy.
Okuw seminarynyň dowamynda bilermen Merkezi Aziýa döwletleriniň syýasy, ykdysady mümkinçiliklerini ýerlikli peýdalanmakda «Merkezi Aziýa + 1» formatdaky hyzmatdaşlygyň aýratynlygy, ylaýta-da, «Merkezi Aziýa – Hytaý» sammitleriniň ýurdumyzyň milli ykdysadyýetini ösdürmekdäki ähmiýeti barada ünsi çekdi. Şeýle-de häzirki zamanda parahatçylygyň, howpsuzlygyň, durnukly ykdysady ösüşiň gazanylmagynda döwletleriň bilelikdäki tagallalarynyň ähmiýeti we täsiri barada köp sanly maglumatlary talyplar bilen paýlaşdy. Okuw sapagy talyplar üçin örän täsirli boldy.
Kaýum ZAHYROW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň I ýyl talyby.