Ulag diplomatiýa ugry boýunça göçme okuw sapagy geçirildi
2023-nji ýylyň 13-nji martynda Türkmen döwlet maliýe institutynda Türkmenistanyň Daşary işler ministrliginiň Halkara gatnaşyklary institutynyň Türkmenistanyň diplomatiýasynyň möhüm ugurlarynyň biri bolan ulag diplomatiýasy boýunça okuw merkeziniň guramagynda “Türkmenistanyň ulag ulgamyndaky ählumumy başlangyçlary halkara hyzmatdaşlygynyň gurallarydyr” atly temada okuw sapagy geçirildi. Bu okuw sapagyna Türkmenistanyň Daşary işler ministrliginiň Halkara gatnaşyklary institutynyň halkara gatnaşyklary we diplomatiýa kafedrasynyň dosenti, teh.y.k. Türkmenistanyň Adatdan daşary we Doly ygtyýarly Ilçisi, «Türkmenistanyň ussat diplomaty» diýen hormatly ada mynasyp bolan, halypa mugallym Çary Nyýazow, şeýle hem Türkmen döwlet maliýe institutynyň talyplary gatnaşdylar. Talyplar üçin okuw sapagy örän täsirli boldy. Täze maglumatlara baý bolan bu sapagyň dowamynda Türkmenistanyň daşary syýasatynyň ösüşi barada talyp ýaşlar mugallymlara hem-de hünärmenlere özlerini gyzyklandyrýan sowallar bilen ýüzlendiler.
Perhat ÇARYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň uly mugallymy.