Türkmenistanyň ýokary okuw mekdepleriniň arasynda wideoaragatnaşyk arkaly guralan okuw sapagy
2021-nji ýylyň 12-nji aprelinde Türkmenistanyň Daşary işler ministrliginiň Halkara gatnaşyklary institutynda Türkmenistanyň Garaşsyzlygynyň 30 ýyllygy, Türkmenistanyň baky Bitaraplygynyň 25 ýyllygy hem-de BMG-niň resmi dilleriniň biri bolan “Iňlis diliniň güni” mynasybetli wideoaragatnaşyk ulgamy arkaly “Türkmenistan we Birleşen Milletler Guramasy: parahatçylygyň we ösüşiň hatyrasyna türkmen diplomatiýasynyň gadamlary” atly okuw sapagy geçirildi. Oňa Türkmenistanyň Daşary işler ministrliginiň Halkara gatnaşyklary institutynyň, M.Garryýew adyndaky Türkmenistanyñ Döwlet lukmançylyk uniwersitetiniň, S.A.Nyýazow adyndaky Türkmen oba hojalyk uniwersitetiniň mugallymlary we talyp ýaşlary gatnaşdylar.
Okuw maslahatyň esasy maksady talyplaryň Türkmenistanyň daşary syýasat ugrunyň ileri tutulýan ugurlary hem-de türkmen diplomatiýasynyň täze şahasy bolan lukmançylyk diplomatiýasynyň ekologiýa diplomatiýasy bilen arabaglanyşygy barada giňişleýin düşünje bermekden ybarat boldy.
Okuw sapagynyň iňlis dilinde alnyp barylmagy bolsa, talyp ýaşlaryň eşitmek we düşünmek, pikirlerini erkin beýan etmek ýaly endikleriniň artmagyna oňyn täsir etdi. Sanly bilim ulgamynyň durmuşa ornaşdyrylmagy ýurdumyzyň ýokary okuw mekdepleriniň, şeýle hem daşary ýurtlardaky Ähtnama baglaşylan ýokary okuw mekdepleriniň arasynda wideoaragatnaşyk arkaly ylmy-maslahatlaryň, webinarlaryň geçirilmegine, ýokary derejeli ussat hünärmenleri taýýarlamak işinde tejribe alyş-çalyş etmekde şertleri döredýär.
Maýa ORAZOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň
uly mugallymy.