TÜRKMENISTANYŇ PARAHATÇYLYGY DÖREDIJI DIPLOMATIÝASYNA BAGYŞLANAN MASLAHAT GEÇIRILDI
2026-njy ýylyň 27-nji fewralynda Türkmenistanyň Daşary işler ministrliginiň Halkara gatnaşyklary institutynda «Garaşsyz, hemişelik Bitarap Türkmenistanyň parahatçylygy dörediji diplomatiýasy» atly ylmy-döredijilik maslahaty geçirildi. Oňa Türkmenistanyň Magtymguly adyndaky Ýaşlar guramasynyň Aşgabat şäheriniň Berkararlyk etrap Geňeşiniň başlygy, Magtymguly adyndaky Türkmen döwlet uniwersitetiniň mugallymy we ýokary okuw mekdebimiziň mugallymlary we talyplary gatnaşdylar.
Maslahatda Türkmenistanyň Magtymguly adyndaky Ýaşlar guramasynyň Aşgabat şäheriniň Berkararlyk etrap Geňeşiniň başlygy öz çykyşynda ýurdumyzyň dünýäde we sebitde pahatçylygy we howpsuzlygy üpjün etmekde öňe sürýän başlangyçlary barada belläp geçdi. Magtymguly adyndaky Türkmen döwlet uniwersitetiniň mugallymy bolsa, halkara gatnaşyklarynda daşary ýurt dilleriniň ähmiýeti we köpdilli diplomatiýanyň orny barada gürrüň berdi.
Maslahatyň dowamynda çykyş edenler halkara parahatçylygy, howpsuzlygy we durnukly ösüşi goldamakda hem-de berkitmekde Türkmenistanyň Bitaraplyk syýasatynyň orny we wajyplygy barada gürrüň berdiler. Mundan başga-da, ýurdumyzyň ekologik howpsuzlyk, ynsanperwer hyzmatdaşlyk bilen baglanyşykly başlangyçlary işjeň öňe sürýändigini nygtadylar.
Ylmy-döredijilik maslahatyň işi üstünlikli jemlenip, oňa gatnaşyjylar türkmen halkynyň abadan durmuşda ýaşamagy, ýurdumyzyň halkara abraýynyň mundan beýläk-de pugtalandyrylmagy ugrunda ägirt uly tagallalary edýän Gahryman Arkadagymyza, Arkadagly Gahryman Serdarymyza hoşallyk sözlerini beýan etdiler.
Sahydöwlet HÜMMETJUMAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.