Türkmenistanyň Harby-Deňiz Güýçleriniň güni
Her ýylyň 9-njy oktýabrynda ýurdumyzda Türkmenistanyň Ýaragly Güýçleriniň Harby-Deňiz Güýçleriniň güni uly dabara bilen bellenilýär. Bu baýramçylyk mynasybetli Türkmenistanyň Goranmak ministrliginiň Harby-deňiz institutynda we Ýöriteleşdirilen harby mekdebinde hem-de Türkmenistanyň Goranmak ministrliginiň Aşgabatdaky merkezi serkerdeler öýünde we Hazaryň kenarynda ýerleşýän harby deňizçiler bölüminde çäreler geçirilýär.
Bu şanly sene Türkmenistanyň Prezidenti Türkmenistanyň Ýaragly Güýçleriniň Belent Serkerdebaşysy Gurbanguly Berdimuhamedowyň 2011-nji ýylyň 10-njy oktýabrynda gol çeken Permanyna laýyklykda ýurdumyzda bellenilýär.
Türkmenistanyň Ýaragly Güýçleriniň Belent Serkerdebaşysy her ýyl Ýaragly Güýçleriniň ähli goşun bölümleri bilen bir hatarda, harby-deňiz güýçleriniň maddy-tehniki üpjünçiligini iň täze we häzirki zaman harby gämilerini satyn almak hem-de iň kämil tehnologiýalary ornaşdyrmak bilen bu ugry pugtalandyrýar. Şeýle-de, deňizçi harby gullukçylaryň söweşjeň hem-de ynsanperwer taýýarlygy günsaýyn ýokarlanýar. Muňa mysal edip, 2015-nji ýylyň 9-njy oktýabrynda Türkmenistanyň Goranmak ministrliginiň Harby-deňiz institutynyň täze binalar toplumynyň şeýle-de, 2016-njy ýylyň 1-nji sentýabrynda Türkmenistanyň Goranmak ministrliginiň Ýöriteleşdirilen harby mekdebiniň açylmagy Belent Serkerdebaşymyzyň bu babatda edýän ägirt uly aladalarynyň netijesidir.
Harby-deňizçilerimiz öz kärlerinde ussatlyk bilen iş alyp barýarlar. Parahatçylygyň we asudalygyň nusgasy hökmünde olar Harby doktrinamyzdan ugur alýarlar. Şonuň üçin hem olaryň deňiz serhedimiziň mizemezligini üpjün etmekde alyp barýan işleri üstünliklere beslenýär.
Batyr ESENOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 1-nji ýyl talyby.