TÜRKMENISTANYŇ HALKARA GATNAŞYKLARYNYŇ HUKUK BINÝADYNYŇ ÄHMIÝETI BARADA WAGYZ-NESIHAT DUŞUŞYGY
2026-njy ýylyň 9-njy iýunynda Türkmenistanyň Daşary işler ministrliginiň Halkara gatnaşyklary institutynda Türkmenistanyň daşary syýasat ugrunyň, hemişelik Bitaraplyk hukuk ýagdaýynyň, halkara başlangyçlarynyň hem-de bu ugurda kabul edilen kanunlaryň ähmiýetini talyp ýaşlara düşündirmek maksady bilen wagyz-nesihat duşuşygy geçirildi. Duşuşyga Türkmenistanyň Mejlisiniň deputatlary, köpçülikleýin habar beriş serişdeleriniň wekilleri, institutyň mugallymlary we talyplary gatnaşdylar.
Duşuşykda Türkmenistanyň Mejlisiniň Halkara we parlamentara aragatnaşyklar baradaky komitetiniň agzasy, Türkmenistanyň Mejlisiniň deputaty Merdan Tuwakow, «Diýar» žurnalynyň baş redaktory Jemal Toryýewa, Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň uly mugallymy Merjen Gurbannazarowa dagy çykyş etdiler.
Wagyz-nesihat duşuşygynda Türkmenistanyň halkara gatnaşyklarynyň berk hukuk binýadyna daýanýandygyny aýratyn bellemek bilen türkmen Bitaraplygynyň halkara-hukuk ýagdaýynyň ýurdumyzyň sebitde we dünýäde parahatçylygy, durnuklylygy hem-de özara bähbitli hyzmatdaşlygy berkitmekdäki geosyýasy orny giňişleýin seljerildi. Aýratyn-da, Türkmenistanyň suw diplomatiýasy, ekologiýa hukugy we sebitara hyzmatdaşlyk boýunça öňe sürýän halkara başlangyçlarynyň dünýä bileleşigi tarapyndan yzygiderli goldanylýandygy nygtaldy. Şeýle-de döwletimiziň diplomatik mirasyny öwrenmegiň hem-de halkara hukugynyň kämil ýoluny durmuşa geçirmegiň geljekki hünärmenler üçin wajyp wezipedigine ünsi çekdiler.
Duşuşygyň ahyrynda talyp ýaşlar halkara gatnaşyklary we hukuk medeniýeti baradaky düşünjelerini baýlaşdyrmak bilen bagly özlerini gyzyklandyrýan sowallaryny berdiler. Soňra oňa gatnaşyjylar milli diplomatiýamyzy bütin dünýäde dabaralandyrýan Gahryman Arkadagymyza hem-de hormatly Prezidentimiz Arkadagly Gahryman Serdarymyza hoşallyk sözlerini beýan etdiler.
Aýlar GURBANDURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 3-nji ýyl talyby