TÜRKMENISTANYŇ DIPLOMATIÝASYNYŇ MÖHÜM UGURLARY BOÝUNÇA OKUW MERKEZINDE OKUW SAPAGY GEÇIRILDI
2024-nji ýylyň 22-nji noýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda «Durnukly ösüş maksatlaryna ýetmek — Türkmenistanyň BMG bilen hyzmatdaşlygynyň strategik ugry» atly okuw sapagy geçirildi. Bu okuw sapagyny Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň mugallymy Türkmenistanyň Adatdan daşary we Doly ygtyýarly Ilçisi Nurberdi Amanmyradow alyp bardy.
Okuw sapagynyň dowamynda ulag ulgamy Türkmenistan bilen BMG-niň arasyndaky hyzmatdaşlygyň ileri tutulýan ugurlarynyň biri bolup durýandygy we ýurdumyzyň başlangyjy boýunça Birleşen Milletler Guramasynyň Baş Assambleýasynyň bu strategik ulgamda özara gatnaşyklary ösdürmäge gönükdirilen Kararnamalaryň birnäçesini kabul edendigi barada halypa diplomat aýratyn belläp geçdi.
Okuw sapagynda magistrantlar we talyplar özlerini gyzyklandyrýan soraglaryna jogap tapdylar hem-de ulag diplomatiýasy baradaky bilimlerini artdyrdylar.
Resul GYLYJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň IV ýyl talyby.