Türkmenistanyň Daşary işler ministrliginiň Halkara gatnaşyklary instituty bilen Al-Faraby adyndaky gazak milli uniwersitetiniň arasynda geçirilen tegelek stol maslahaty
2021-nji ýylyň 8-nji dekabrynda Türkmenistanyň Daşary işler ministrliginiň Halkara gatnaşyklary instituty bilen Gazagystan Respublikasynyň Al-Faraby adyndaky gazak milli uniwersitetiniň arasynda wideo aragatnaşyk ulgamy arkaly “tegelek stol” maslahaty geçirildi. Türkmenistan bilen Gazagystan Respublikasynyň Garaşsyzlygynyň 30 ýyllygyna, Türkmenistanyň Bitaralygynyň 26 ýyllygyna, Türkmenistanyň Daşary işler ministrliginiň Halkara gatnaşyklary instituty bilen Gazagystan Respublikasynyň Al-Faraby adyndaky gazak milli uniwersitetiniň arasynda hyzmatdaşlygy ösdürmegiň meselelerine bagyşlanylan bu maslahata degişli ýokary okuw mekdepleriň professor-mugallymlary gatnaşdylar.
Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory G.Ýusupowanyň alyp barmagynda geçirilen “tegelek stolda” Halkara gatnaşyklary institutynyň Halkara gatnaşyklary we diplomatiýa kafedrasynyň uly mugallymy B.Karaýew, Jemgyýeti öwreniş ylymlary kafedrasynyň uly mugallymy O.Ezimowa çykyş edip, türkmen-gazak gatnaşyklarynyň barha rowaçlanýandygyny, bu ýokary okuw mekdepleriniň ylmy hyzmatdaşlygynyň işjeňleşýändigini aýratyn nygtap geçdiler.
Al-Faraby adyndaky gazak milli uniwersitetiniň Dünýä ykdysadyýeti we halkara gatnaşyklary kafedrasynyň professor-mugallymlary M.Gubaýdullinanyň, G.Mowkebaýewanyň we M.Auganyň çykyşlarynda türkmen-gazak gatnaşyklaryny, ýokary okuw mekdepleriniň arasyndaky hyzmatdaşlygy has-da ösdürmegiň mümkinçilikleriniň üstünde durlup geçildi.
Taraplar ylmy hyzmatdaşlygy ösdürmek boýunça duşuşyklary yzygiderli geçirmegiň uly ähmiýetiniň bardygyny bellediler.
Arslan SYÝAHATOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.