Türkmenistanyň BMG-niň Baş Assambleýasynyň 80-nji sessiýasyna gatnaşmagy we onda öňe sürülen teklipler mynasybetli ylmy döredijilik maslahaty
2025-nji ýylyň 3-nji noýabrynda Türkmenistanyň Daşary işler ministrliginiň Halkara gatnaşyklary institutynda “Ýaş diplomatlar” ylmy gurnagynyň Türkmenistanyň Magtymguly adyndaky Ýaşlar guramasynyň Merkezi geňeşi bilen bilelikde guramagynda Birleşen Milletler Guramasynyň döredilmeginiň 80 ýyllygy, Türkmenistanyň BMG-niň Baş Assambleýasynyň 80-nji sessiýasyna gatnaşmagy we onda öňe sürülen teklipler mynasybetli ylmy döredijilik maslahaty geçirildi. Maslahatyň maksady ýaş diplomatlaryň arasynda hormatly Prezidentimiziň halkara syýasy giňişliginde öňe sürýän uzak möhletli maksatlara laýyk gelýän tekliplerini giňden wagyz etmekden we ýurdumyzyň alyp barýan parahatsöýüjilikli syýasaty baradaky bilimlerini has-da artdyrmakdan ybaratdyr.
Ylmy döredijilik maslahatda BMG-niň Merkezi Aziýa üçin öňüni alyş diplomatiýasy boýunça sebit merkeziniň Jemgyýetçilik bilen gatnaşyklar boýunça kömekçisi Bahargül Rahmanowa, Türkmenistanyň Magtymguly adyndaky Ýaşlar guramasynyň Merkezi geňeşiniň ýanyndaky Maglumat, maslahat beriş we meýletinçilik hereketiniň işleri boýunça Merkeziniň başlygy Annageldi Godorow, Halkara ynsanperwer ylymlary we ösüş uniwersitetiniň Halkara gatnaşyklary kafedrasynyň müdiri Arslan Çaryýew, şeýle-de Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa fakultetiniň talyby Aýlar Nedirowa dagylar çykyş etdiler.
Çykyş edenler Halkara parahatçylyk we ynanyşmak ýylynda Türkmenistanyň hemişelik Bitaraplygynyň 30 ýyllyk baýramynyň, Birleşen Milletler Guramasynyň döredilmeginiň 80 ýyllygynyň bellenilýän günlerinde geçirilen guramanyň Baş Assambleýasynyň 80-nji sessiýasynyň dabaraly açylyşyna hormatly Prezidentimiziň gatnaşmagy we dünýä ähmiýetli öňe süren oňyn başlangyçlary barada giňişleýin belläp geçdiler. Maslahatyň ahyrynda çykyş edenler talyplaryň özlerini gyzyklandyrýan soraglaryna jogap berdiler.
Aýgözel BAÝRAMOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa kafedrasynyň
mugallym-öwrenijisi.