TÜRKMENISTANYŇ BMG-NIŇ AGZALYGYNA KABUL EDILMEGINIŇ 30 ÝYLLYGYNA!
2022-nji ýylyň 3-nji martynda Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş hem-de Dünýä dilleri kafedralarynyň bilelikde gurnamagynda Türkmenistanyň BMG-niň agzalygyna kabul edilmeginiň 30 ýyllygy mynasybetli baýramçylyk duşuşygy geçirildi.
Şanly sene mynasybetli geçirilen duşuşykda institutyň Halkara hukugy fakultetiniň “Ýaş hukukçylar” ylmy gurnagynyň agzalary iňlis we rus dillerinde çykyş etdiler. Çykyşlarda Birleşen Milletler Guramasynyň mundan 30 ýyl ozal, ýagny 1992-nji ýylyň 2-nji martynda taryhy Kararnamany kabul edendigini, oňa laýyklykda Türkmenistanyň Milletler Bileleşiginiň doly hukukly agzasy bolandygyny barada gürrüň edildi. Şeýle hem bu döwrüň içinde Türkmenistan “açyk gapylar” syýasatyny işjeň durmuşa geçirmek bilen, bu abraýly halkara guramasy hem-de onuň ýöriteleşdirilen edaralary bilen parahatçylyk, howpsuzlyk we durnukly ösüş ulgamynda hyzmatdaşlygyny netijeli ösdürýändigi barada giňişleýin bellenildi. Duşuşygyň ahyrynda talyplaryň arasynda Birleşen Milletler Guramasy baradaky maglumatlar boýunça ýörite wiktorina hem geçirildi. Bu bolsa duşuşygyň has hem täsiriniň artmagyna getirdi.
Türkmenistanyň we Birleşen Milletler Guramasynyň özara hereketleriniň esasy ugurlary strategiki häsiýete eýe bolup durýandyr. 1995-nji ýylyň 12-nji dekabrynda Türkmenistan hemişelik Bitaraplygyna eýe boldy, ol bolsa BMG-niň Baş Assambleýasynyň degişli Kararnamalary bilen eýýäm iki gezek berkidildi. Hemişelik Bitaraplyk hukuk derejesinden ugur almak bilen, Türkmenistan ençeme gezek ählumumy parahatçylygyň, howpsuzlygyň we durnukly ösüşiň üpjün edilmegine gönükdirilen başlangyçlar bilen çykyş etdi.
Bu ugurda Aşgabadyň BMG-niň Merkezi Aziýada Öňüni alyş diplomatiýasy boýunça Sebitleýin merkeziniň ştab-kwartirasynyň ýerleşýän ýerine öwrülendigi aýratyn ähmiýete eýedir. Türkmenistan ýurdumyzda BMG-niň ulgamynyň geriminiň giňeldilmegine aýratyn gyzyklanma bildirýändir. Häzirki wagtda Türkmenistanyň BMG-niň platformasyndaky özara hereketleri ýurduň durmuşynyň dürli ulgamlaryny öz içine alýandyr. Bu bolsa Türkmenistanyň BMG-niň birnäçe geňeşlerine, komissiýalaryna we komitetlerine agzalygy bilen şertlendirilendir.
Türkmenistan BMG-niň abraýly agza-döwleti bolup durýar hem-de Guramanyň maksatlaryna ýetmekde işjeň we netijeli orny eýeleýär, şol sanda sebit hem-de halkara hyzmatdaşlygyny ösdürmek we öňüni alyş diplomatiýasyny ilerletmek arkaly uly ähmiýetli işleri amala aşyrýar.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň uly mugallymy