Türkmenistanyň Alp Arslan adyndaky milli drama teatry ýokary okuw mekdebimizde myhmançylykda
2022-nji ýylyň 29-njy ýanwarynda Türkmenistanyň Daşary işler ministrliginiň Halkara gatnaşyklary institutynyň uly mejlisler zalynda talyplaryň gyşky dynç alyş möwsümini täsirli we netijeli geçirmeklerini üpjün etmek maksady bilen medeni çäre guraldy. Bu medeni çäräniň dowamynda Türkmenistanyň Alp Arslan adyndaky milli drama teatrynyň artistleri ýokary okuw mekdebimizde myhmançylykda bolup, özleriniň taýýarlan gülkili sahna eserleri, aýdym-sazlary bilen çykyş etdiler.
Ýurdumyzyň ady belli artistleriniň ussatlyk bilen ýerine ýetiren sahna eserleri, ýokary ruhubelentlige beslenen şirin labyzly aýdym-sazlary talyp tomaşaçylarda uly täsir galdyrdy. Görkezilen sahna eserler, ýerine ýetirilen aýdym-sazlar, terbiýeçilik ähmiýete eýe bolup, Berkarar döwletimiziň bagtyýarlyk döwrüniň ruhuny çeper şöhlelendirendigini aýratyn nygtamak bolar. Ýokary okuw mekdebimiz tarapyndan guralýan şeýle medeni-köpçülikleýin çäreler, talyp ýaşlaryň gyşky dynç alyş möwsümini manyly we gyzykly geçirmeklerine ýardam edýär. Talyplarymyz şeýle çärelerde özleriniň boş wagtlaryny netijeli geçirmek bilen birlikde, öz dünýägaraýyşlaryny giňeltmek, medeniýetli dynç almak mümkinçiligine hem eýe bolýarlar. Munuň özi bolsa, talyplary okuw ýylynyň ikinji ýarymýyllygyny üstünlikli geçirmäge ruhlandyryp, olary täze döredijilik gözleglerine höweslendirýär.
Gurbanmyrat AŞYROW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.