«Türkmenistan – parahatçylygyň we ynanyşmagyň Watany» diýlip atlandyrylmagy mynasybetli maslahat
2021-nji ýylyň 13-nji ýanwarynda Türkmenistanyň Daşary işler ministrliginiň Halkara gatnaşyklary institutynyň mejlisler zalynda ata Watanymyza gadam basan Täze – 2021-nji ýylyň «Türkmenistan – parahatçylygyň we ynanyşmagyň Watany» diýlip atlandyrylmagy mynasybetli maslahat geçirildi. Maslahata institutyň professor mugallymlary we talyp ýaşlary gatnaşdylar. Maslahatyň dowamynda 2021-nji ýylyň «Türkmenistan – parahatçylygyň we ynanyşmagyň Watany» diýlip atlandyrylmagynyň ähmiýeti dogrusynda, bu ýylda mukaddes Garaşsyzlygymyzyň 30 ýyllygynyň giň gerimde bellenilýändigi barada, şeýle hem bu ýylyň manysynyň hormatly Prezidentimiziň başlangyjy bilen BMG-nyň Baş Assambleýasynyň 73-nji mejlisinde «2021-nji ýyl – Halkara parahatçylyk we ynanyşmak ýyly» diýlip kabul edilen Kararnama bilen baglanyşyklydygy barada giňişleýin çykyş etdiler. Mundan başga-da, maslahatda çykyş edenler baky Bitaraplygymyzyň 25 ýyllygynyň dabaraly bellenilip geçilen ýylynda ýurdumyzyň içeri we daşary syýasatynda amala aşyrylan beýik işleriň ähmiýeti barada hem belläp geçdiler. Maslahatyň ahyrynda sebitde we bütin dünýäde parahatçylygy, howpsuzlygy, durnuklylygy üpjün etmäge gönükdirilen beýik başlangyçlary, umumadamzat bähbitli tagallalary durmuşa geçirýän Gahryman Arkadagymyza alkyş sözleri aýdyldy.