Türkmen – owgan gatnaşyklaryna bagyşlanan okuw sapagy
2022-nji ýylyň 27-nji dekabrynda Türkmenistanyň Daşary işler ministrliginiň Halkara gatnaşyklary institutynda hereket edýän Türkmenistanyň diplomatiýasynyň möhüm ugurlary boýunça okuw Merkeziniň çäklerinde Türkmenistanyň Mazari-Şarif şäherindäki Konsuly Bazarbaý Kabaýewiň, şeýle-de institutyň talyplarynyň gatnaşmagynda «Ulag diplomatiýasy» boýunça okuw sapagy geçirildi.
Konsul duşuşygyň dowamynda türkmen-owgan gatnaşyklarynyň barha giň gerime eýe bolýandygyny belläp, bu babatda ulag ulgamyndaky hyzmatdaşlygyň ileri tutulýan ugurlaryň biridigine ünsi çekdi. Hususan-da, Türkmenistanyň Owganystandaky Konsuly ýurdumyzyň owgan halkynyň asuda we abadan ýaşamagyny gazanmakda berýän goldawynyň goňşy döwletiň ýerli ilaty tarapyndan çuňňur minnetdarlyk bilen kabul edilýändigini aýratyn belledi. Bazarbaý Kabaýew Türkmenistanyň Owganystandaky ykdysady ýagdaýy durnuklaşdyrmak maksady bilen bilelikdäki halkara taslamalara uly üns berýändigini belläp, olaryň hatarynda Türkmenistan – Owganystan – Pakistan – Hindistan gazgeçirijisi barada gürrüň berdi.
Tejribeli Konsul iki ýurduň arasyndaky özara hormat goýmak ýörelgelerine esaslanýan dost-doganlyk gatnaşyklary barada gürrüň açyp, Türkmenistan bilen Owganystanyň arasyndaky syýasy, söwda-ykdysady, medeni-ynsanperwer, ulag diplomatik gatnaşyklaryň önjeýli ösüşine hem ýokary baha berdi. Geçirilen täsirli okuw sapagy talyplar üçin gyzykly bolup, olar ulag diplomatiýasy bilen bagly, özlerini gyzyklandyrýan sowallara giňişleýin jogap aldylar.
Gülnar AKYLLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.