“Türkmen halysy – älem sazlaşygy” atly maslahat geçirildi
2021-nji ýylyň 10-njy dekabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Senagatçylar we telekeçiler partiýasy bilen institutyň Halkara ykdysady gatnaşyklary fakulteti tarapyndan guralan «Türkmen halysy – älem sazlaşygy» atly maslahat geçirildi. Bu maslahata ýurdumyzyň telekeçilik ulgamynyň wekilleri, “Ýaş ykdysatçylar” ylmy gurnagynyň agzalary, Aşgabat şäheriniň 21-nji ýöriteleşdirilen okuw-terbiýeçilik mekdebiniň okuwçylary gatnaşdylar.
Maslahatda “Mähirli zenan” hususy kärhanasynyň esaslandyryjysy Aýna Durdylyýewa çykyş edip, türkmen halyçylyk sungatynyň asyrlaryň dowamynda sünnälenip, gelin-gyzlarymyz tarapyndan kämilleşip, öz nepisligi, owadan öwüşginliligi bilen tapawutlanýandygyny belledi. Şeýle hem myhman çykyşynda Berkarar döwletimiziň bagtyýarlyk döwründe hormatly Prezidentimiziň hususy pudagy ösdürmek babatda alyp barýan syýasatynyň üstünlikli durmuşa geçirilmegi netijesinde ýurdumyzda telekeçilik ulgamynyň täze belent sepgitlere çykandygyny nygtady.
Maslahatyň çäklerinde “Ýaş ykdysatçylar” ylmy gurnagynyň agzalary hormatly Prezidentimiziň “Älem içre at gezer”, “Türkmenistan – Bitaraplygyň mekany”, “Türkmenistan – Beýik Ýüpek ýolunyň ýüregi”, “Türkmeniň döwletlilik ýörelgesi” alty kitaplaryndan watançylyk, terbiýeçilik, ynsanperwerlik, ene-ata hormat goýmak ýaly dürli temalardan çeper okaýyşlary ýerine ýetirdiler.
Maslahatda tejribe alyşmakda we göni işewürlik gatnaşyklaryny ýola goýmakda bilelikdäki duşuşyklaryň, ylmy-amaly maslahatlaryň we beýleki çäreleriň geçirilmeginiň uly ähmiýetiniň bardygy bellenildi.
Maslahata gatnaşyjylar ýaşlary telekeçilik işine giňden çekmekde berýän çäksiz goldawlary üçin hormatly Prezidentimize alkyş sözlerini aýtdylar.
Sülgün NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň mugallymy.