Türkiýe Respublikasynyň ilçisi bilen duşuşyk
2021-nji ýylyň 2-nji martynda Türkmenistanyň Daşary işler ministrliginiň Halkara gatnaşyklary institutynyň rektory J.Gurbangeldiýew bilen Türkiýe Respublikasynyň Türkmenistandaky Adatdan daşary we Doly ygtyýarly ilçisi Togan Oralyň arasynda wideoaragatnaşyk arkaly duşuşyk geçirildi.
Duşuşykda goňşy ýurtlar bilen dostlukly, özara bähbitli gatnaşyklary ösdürmegiň, hyzmatdaşlyga täze mazmun bermegiň, pugtalandyrmagyň we işjeňleşdirmegiň Türkmenistanyň hormatly Prezidentiniň baştutanlygynda üstünlikli alnyp barylýan daşary syýasatyň ileri tutulýan ugurlary bolup durýanlygy hem-de Türkmenistanyň Türkiýe Respublikasy bilen gatnaşyklarynyň ýurdumyzyň daşary-syýasy strategiýasynda esasy orun tutýanlygy bellenildi.
Duşuşykda taraplar türkmen-türk hyzmatdaşlygynyň möhüm ugry hökmünde bilim ulgamyndaky gatnaşyklaryň netijeli ösýändigini belläp geçmek bilen, soňky ýyllarda Türkmen diplomatiýasynyň milli mekdebiniň mysalynda anyk işleriň amala aşyrylýanlygyny bellediler.
2012-nji ýylda Türkmenistanyň Daşary işler ministrliginiň Halkara gatnaşyklary instituty bilen Türkiýe Respublikasynyň Daşary işler ministrliginiň Diplomatiýa akademiýasynyň arasynda hyzmatdaşlyk babatynda özara düşünişmek hakyndaky Ähtnama gol çekildi. Institutymyzyň talyplary Türkiýäniň uniwersitetlerinde tanyşlyk saparynda boldular. Türk professorlary Türkmen diplomatiýasynyň milli mekdebinde, institutyň mugallymlary bolsa Türkiýede talyplaryň öňünde umumy sapaklar bilen çykyş etdiler. Türkiýe Respublikasynyň hökümetiniň ýakyndan ýardam bermeginde Türkmenistanyň Daşary işler ministrliginiň Halkara gatnaşyklary institutynda birnäçe halkara ylmy-amaly maslahatlar we beýleki syýasy ähmiýetli çäreleriň birnäçe üstünlikli geçirildi.
Duşuşygyň barşynda ylmy hyzmatdaşlygy giňeltmeklige gönükdirilen işleriň alnyp barlyşy we ony ösdürmegiň mümkinçilikleri ara alnyp maslahatlaşyldy. Taraplar bu hyzmatdaşlygyň gerimini giňeltmek boýunça degişli teklipleri hem hödürlediler.
Kuwwat MÄMEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby